खोज

बुटवल, १३ असोज ।

बुटवल कालिकानगरस्थित आफ्नो सानीआमाको घरमा बसेकी प्रमिता बुबाको श्राद्ध परेकाले काठमाडौं जाने तर्खरमा थिइन् । उनका श्रीमान विवेक काठमाडौंमा श्रीमती आउने पर्खाइमा थिए । प्रमिताका ससुरा बुवा बुटवल बसपार्कमा बसपार्कमा प्रमितालाई कुरिरहेका थिए । प्रमिता र उनका २ वर्षीय छोरालाई आफ्नो अंकलले बिहान ७ बजे काठमाडौं जाने लु २ ख ४५७८ नम्बरको विङ्गरमा चढाएर फर्किए । भारी वर्षाले ठाउँठाउँमा बाढी पहिरो आएको खवर सुनेकी प्रमिताकी सानीआमाले १÷१ घण्टामा फोन गरिराख्थिन् । उनले भक्कानिंदै घटना विवरण सुनाउँदै भनिन् ‘बाबु भर्खर हिड्न सुरु गरेको थियो, नानीलाई आज पानी आइरहेको छ, नजा नजा भनेको मानिन । विवेककी सानीआमा हिजो खबर पाएदेखि नै अचेतजस्तै भएर ढलिरहेकी छन् ।

विवेकले ३ वर्षअघि मात्रै आमा गुमाएका थिए । त्यसपछि उनी मामाहरुको छत्रछायाँ हुर्के । गुल्मी दरबार गाउँपालिका चारपाला घर भएका विवेकको खुसी शनिबार झ्याप्ले खोलाले खोसिदियो । झ्याप्ले खोलाको पहिरोमा विवेकले श्रीमती र छोरो मात्रै गुमाएनन्, बुबा पनि गुमाए । पहिरोमा परेका उनका बुवा विरबहादुर रायमाझी भारतमा सेवारत थिए । लामो समय दिल्ली बसेपछि उनी अब नजाने गरी यतै आएका थिए । तर पहिरोले उनलाई कहिल्यै नफर्कने गरी लिएर गएको छ । उनीसँगै लामो समय सँगै बसेका भाई पोषण पाण्डेले हिजो खबर पाएदेखि भावव्हिल छन् । ‘दाईलाई फोन गर्न सकिरहेको छैंन, तीनजनाकै लास शिक्षण अस्पताल, काठमाडौंमा राखिएको जानकारी आएको छ । मौसम खराबीको कारण काठमाडौ गईहाल्ने अवस्था पनि छैन ।’

विवेक गाउँमा कसैलाई अप्ठेरो पर्दा सहयोग गर्न सधै अग्रसर हुन्थे । तर आफ्नै परिवार पहिरोमा पुरिंदा न त उनले सहयोग गर्न पाए न त अन्तिम अवस्थामा अनुहार देख्न नै । आफूले जन्माएको २ बर्षको छोरो लिएर आफ्नो ससुरा वुबासँग काठमाडौं हिडेकी श्रीमती प्रमिता अब कहिल्यै नआउने गरी आफ्नो छोरोसहित सधैका लागि अस्ताएकी छन् ।

प्रमिता केही दिन अगाडि मात्रै आफ्नो नागरिकताको प्रतिलिपि बनाउन भन्दै काठमाडौंबाट गुल्मी आएकी थिइन् । गुल्मी झिरुबासकी प्रमिता भुसालले साढे ३ बर्ष अगाडि मात्रै विवेकसँग वैवाहिक सम्बन्ध गाँसेकी थिइन् । आमा गुमाएर परिवारको मायाबाट बञ्चित भएका विवेकलाई आमा र श्रीमतीको माया दिएकी थिईन प्रमिताले । प्रमिताको आगमन विवेकको लागि नयाँ जीवन थियो । २ बर्ष अगाडि उनले छोरा क्रिशलाई जन्म दिएकी दिइन् । लामो समय बुटवलको योगिकुटीस्थित शान्तिचोकमा बाईक अड्डा हुँदै फल्स सिलिङ्ग, नास्ता पसल लगायतबाट व्यावसायिक यात्रा गरेका विवेकले आफ्नो यात्रालाई अझ उचाईमा लैजान चहान्थे । त्यसैले झण्डै ६ महिना अगाडि मात्रै उनी काठमाडौंको थानकोटमा गई मोटरसाईकल मर्मत केन्द्र चलाइरहेका थिए ।

परिवारको सल्लाहमै काठमाडौं गएर व्यवसाय गर्ने निधो गरेका उनले हरेकदिन परिवारको खुसीको लागि धेरै संघर्ष गरे । राति १२ बजेसम्मपनि फोन उठिरहेको थियो । विवेकले फेसबुकमा भावुक हुँदै लेखेका छन् । ‘५ मिनेटमा लिन आउनु भन्थ्यौ, तर मलाई अर्को ठाउँमा बोलाएर तिमी कहाँ गयौं ?’

अविरल बर्षाको कारण धादिङको नौविसे नजिकै झ्याप्लेखोलामा गएको पहिरोमा परी शनिबार मात्र १४ जनाको लास निकालिएको थियो भने आइतबार पनि सोही क्षेत्रमा अर्को बस पुरिएको अवस्थामा भेटिएको छ ।