खोज

बुटवल, १२ असोज । रुपन्देहीलाई स्वास्थ्य क्षेत्रको हबका रुपमा पहिचान दिन स्वास्थ्य संस्थाहरुको स्तरवृद्धि र विशिष्टिकृत सेवा अघि बढाउनुपर्ने एक कार्यक्रमका बक्ताहरुले जोड दिएका छन । रोटरी क्लब अफ बुटवलका पदाधिकारीहरुले शनिबार गौतम बुद्ध सामुदायिक मुटु अस्पतालमा अन्तरक्रिया तथा क्लबको १५३३ औ नियमित बैठक गरि नीजि र सामुदायिक लगानीबाट संचालन भएका स्वास्थ्य संस्थाहरुलाई विशिष्टिकृत सेवा दिने गरि अघि बढाउनुपर्ने सुझाव दिए ।

लुम्बिनी प्रदेशमा नै रोटरी क्लब अफ बुटवलले मुटु रोग उपचारमा टेवा दिने गरि ६ करोड रुपैया लागतको परियोजनामार्फत क्याथ ल्याब हस्तान्तरण गरेको क्लबका अध्यक्ष प्रज्वल थान्जुले बताए । परियोजनाले मुटु रोगका बिरामीहरूलाई उपचारका लागि ठूला सहरहरूमा जानुपर्ने झन्झटबाट बचाउने मात्र होइन, स्थानीय स्तरमै गुणस्तरीय सेवा प्रदान गर्ने वातावरण सिर्जना गरेको भन्दै उनले आगामी दिनमा समेत यस क्षेत्रका रोटरीको सहकार्यमा परियोजनाहरु अघि बढाउने प्रतिवद्धता जनाए ।

कार्यक्रममा मुटु अस्पतालका अध्यक्ष एजाज आलमले बिसं २०७० साल पुस १० गते स्थापना भएको मुटु अस्पतालबाट झण्डै ११ सय मुटुका विरामीले क्याथ ल्याब सेवा लिएको बताए । लुम्बिनी प्रदेशमै पहिलो पटक क्याथल्याब सेवा सुरु गरेको अस्पतालमा एन्जियोग्राफी, एन्जियोप्लाष्ट, पेशमेकर, पेरिकार्डियोसेन्टिसिस, पिटिएमसि र आरएचसि, सिटिस्क्यान लगायतका सेवा प्रदान हुँदै आएको उनले बताए ।

यसैगरि लुम्बिनी प्रदेशमा करिब ८ सय मृगौलाका विरामी रहेकोमा ५ सय भन्दा बढि मृगौलाका विरामीले मुटु अस्पतालले विभिन्न स्थानमा संचालन गरेका डायलाईसिस सेन्टरबाट नियमित मृगौलाको डायलाईसिस सेवा लिँदै आएका छन् । बुटवलको अस्पतालसँगै दाङको लमही, पाल्पा, वालिङमा डायलाईसिस सेन्टर संचालन भईरहेका छन् । अस्पताललाई स्थान अभाव एक प्रमुख चुनौतीको रूपमा रहेको कुरा उल्लेख गर्दै सेवा विस्तार गर्न वा थप नयाँ उपकरणहरू राख्न कठिनाइहरू भोग्नुपरेको बताए । रुपन्देहीका उद्योगी व्यवसायी, विभिन्न रोटरी क्लब तथा समाजसेवीहरुको सहयोगमा स्थापना भएको अस्पतालको जग्गा प्राप्ती र भवन निर्माणमा अभिभावकत्व सरकारबाट लिनुपर्ने उनले आग्रह गरे । अस्पतालको सेवालाई प्रभावकारी रूपमा अगाडि बढाउन र थप बिरामीहरूको उपचार गर्नका लागि अहिलेको भाडामा संचालन भएको स्थान पर्याप्त नभएको समेत बताए ।

कार्यक्रममा क्लबका पूर्वअध्यक्ष महेन्द्र प्रसाद श्रेष्ठ, पुरन प्रसाद श्रेष्ठ, आमोद सिमागैडा, प्रेसिडेन्ट नोमिनी मधु प्रसाद अर्याल, सचिव बिरेन्द्र रानाले अस्पताललाई सबैको अपनत्व हुने गरि लैजान सुझाव दिए ।