खोज

नवलपरासी सुस्ता ।

नवलपरासीको बर्दघाट सुस्ता पश्चिममा नारायणी नदीमाथि बनेको झोलुंगे पुलेको राष्ट्रपति रामचन्द्र पौडेलले उद्घाटन गरेका छन् । पुलको उद्घाटन गर्दै राष्ट्रपति पौडेलले नारायणी नदीमाथि बनेको पुलले जोखिमपूर्ण यात्रा गर्नुपर्ने स्थानीयवासको बाध्यता अब सधैँका लागि अन्त्य गरेको बताएका छन् ।

उनले अब यस क्षेत्रका बासिन्दाले डुंगाको माध्यमबाट जोखिमपूर्ण यात्रा गर्नुपर्ने अवस्था को अन्त्य भएको बताएका छन् । बिहीबार सुस्तामा शहरी विकास मन्त्रालय, स्थानीय पूर्वाधार विभाग, सस्पेन्सन बृज डिभिजनद्वारा निर्मित त्रिवेणी महेशपुर (सुस्ता) मल्टिस्पान झोलुङ्गे पुलको उद्घाटन गर्दै राष्ट्रपति पौडेलले पुल निर्माणले स्थानीयवासीको जीवनमा राहत मिलेको बताए ।
उद्घाटन कार्यक्रममा कार्यवहाक प्रधानमन्त्री एवम् शहरी विकासमन्त्री प्रकाशमान सिंह, लुम्बिनी प्रदेश प्रमुख कृष्णबहादुर घर्ती मगर, मुख्यमन्त्री चेतनारायण आचार्य, उर्जा, जलस्रोत तथा सिंचाई मन्त्री दिपक खड्का, लुम्बिनी प्रदेशका सभामुख तुलाराम घर्ती मगर लगायत प्रतिनिधि सभा सदस्य, प्रदेश सभा सदस्य तथा स्थानीय तहका जनप्रतिनिधिहरुको सहभागिता रहेको थियो ।
नारायणी नदीमाथी बनेको डबल स्प्यानको उक्त झोलुङ्गे पुल १५७२ मिटर लामो छ । राष्ट्रपति पौडेलले उक्त झोलुङ्गेपुलको निर्माणले सुस्ता क्षेत्रमा उत्पादन हुने कृषि उपजले उपयुक्त बजार भाउ पाउने भन्दै अब यहाँका बासिन्दालाई आवश्यक पर्ने वस्तु तथा सेवाहरूको सहज पहुँच हुने अवस्था सिर्जना गरेको बताए ।

उनले भने, “वर्षौदेखी सडक सञ्जालबाट टाढाँ रहेको सुस्तामा पुलको अभावमा सरकारी सेवा लिन २–३ दिनको समय लगाएर जोखिमपूर्ण यात्रा गरी गाउँपालिकाको केन्द्र तथा सदरमुकाम पुग्नुपर्ने अवस्था थियो, अब यो अवस्था अन्त्य भएको छ ।”

राष्ट्रपति पौडेलले हिन्दु धर्मावलम्वीहरूको पवित्र तपोभूमिको रुपमा रहेको त्रिवेणीधामसंग जोड्ने नारायणी नदीमाथि निर्माण भएको नेपालकै लामो यस झोलुङ्गे पुलको निर्माणले यस क्षेत्रमा आउने पर्यटकलाई अझ आकर्षित गर्ने बताए ।