खोज

सुर्खेत ।

सुर्खेतको सिटी बसपार्कमा यात्रु तानातान गर्ने तीन जनालाई प्रहरीले नियन्त्रणमा लिएको छ । बसपार्कमा लफडा भएपछि तीन जनालाई प्रहरीले नियन्त्रणमा लिएको छ । यात्रुलाई तानातान गर्ने क्रियाकलापमा सक्रिय यातायात व्यवसायी समितिका व्यक्तिहरूलाई नियन्त्रणमा लिइएको जिल्ला प्रहरी कार्यालय सुर्खेतका प्रवक्ता प्रहरी उपरीक्षक वीरेन्द्रवीर विश्वकर्माले जानकारी दिए । व्यवसायीहरु बीचको प्रतिस्पर्धाका कारण यात्रुहरुलाई दुःख दिने गरेको उनले बताए । यात्रुहरु स्वच्छिक रुपमा सवारी साधनमा बस्न दिनुपर्छ भनेर सम्झाइ रहँदा पनि व्यवसायीहरु अटेरी गरिरहेको उनले बताए ।

उनका अनुसार यसअघि विभिन्न समितिहरू मिलेर बनेको संयुक्त यातायात प्रालि फुटेर छिन्न भिन्न भएको छ । फुटेकाहरू नियम, कानुन भन्दा बाहिर गएर मनमर्जी गर्ने, लडाइँ, झगडा गर्ने र यात्रुलाई तानातान गरेर दुःखदिने काम गरिरहेको उनले बताए । ‘बसपार्कमा दिन हुँलफडा त छ, यात्रुलाई अनावश्यक दुख दिएको गुनासो आइरहेको छ’उनले भने, ‘यातायात व्यवसायीका कारण प्रहरीलाई समेत दुःख भएको छ । उनीहरू नियमनै मान्दैनन् ।’

यस अघि पनि व्यवसायी बीच पटक—पटक विवाद हुँदा प्रहरी समक्ष मुद्दा आइरहेको भन्दै डिएसपि विश्वकर्माले उनीहरुलाई सम्झाउने काम भइरहेको बताए । ‘सबैभन्दा त यिनिहरुको आन्तरिक विवाद चर्किदै गइरहेको छ’ उनले भने, ‘यसले गर्दा यात्रुहरुलाई नै बढी मारमा परिरहेका हुन्छन् ।’