खोज

सुर्खेत ।

प्रदेश अस्पताल सुर्खेतमा सुत्केरीको मृत्यु भएपछि आफन्तहरुले प्रर्दशन गरेका छन् । वीरेन्द्रनगर नगरपालिका –६ की १८ वर्षीया शर्मिला सुनारको सुत्केरीपछि चिकित्सकको लापरबाहीले मृत्यु भएको भन्दै आफन्तहरू आन्दोलित भएका हुन् ।

शर्मिलालाई सुत्केरी व्यथा लागेपछि आइतबार प्रदेश अस्पतालमा पुगेकी थिइन् । डाक्टरले सामान्य अवस्था भनेर जानकारी गराइरहेका बेला एक्कासि सोमबार (आज) बिहान ४ बजे मृत्युको खबर दिएको आफन्तहरू बताउँछन् । मृत्युको खबर दिनुअघि अस्पतालबाट प्रहरी बोलाइएको आफन्तहरूको भनाई छ । सुुत्केरीका आफन्तहरूले अप्रेसनमा सहभागी डाक्टरहरूलाई कारबाहीको माग गरेर आन्दोलन गरेका छन् ।

यता अस्पताल प्रशासनले भने सुत्केरीलाई भर्ना गरेपछि बच्चा नचलेको र राती मृत बच्चा जन्मेकोे जनाएको छ । ‘सुत्केरीमा ज्वरो आइरहेको थियो र सुत्केरी भएपछि रक्तस्राव बढी भयो’ प्रदेश अस्पताल सुर्खेतका सूचना अधिकारी विनोद बस्नेतले भने, सुत्केरी रक्तस्रावपछि बेहोस हुनु भो त्यसपछि आइसियुमा राखेर उपचार गरिरहेको बेला बिहान मृत्यु भएको हो ।’

अस्पतालमा अप्रिय घटना नहोस् भनेर बिहानदेखि डिएसपीको नेतृत्वमा प्रहरी परिचालन गरिएको सुर्खेत प्रहरीले जनाएको छ । पीडितहरू अस्पतालमा आएपछि तोफोडका घटना र सम्भावित घटना नहोस् भनेर डिएसपीको नेतृत्वमा प्रहरी परिचालन गरिएको सुर्खेतका प्रहरी प्रमुख एसपी) रुपेश खड्काले बताए।