खोज

सुर्खेत, २ असोज ।

पछिल्लो समय कर्णाली प्रदेशमा भ्रष्टाचारका मुद्दा बढ्दै गएको पाइएको छ । अख्तियार दुरुपयोग अनुसन्धान आयोग कर्णाली प्रदेश कार्यालयका अनुसार चालु आर्थिक वर्षको पछिल्लो दुई महिनाको अवधिमा मात्र झण्डै तीन सय वटा मुद्दा दर्ता भएका छन् ।

कार्यालयका अनुसार साउन महिनामा एक सय ८९ वटा मुद्दा दायर भएका छन् भने भदौं महिनामा एक सय १३ मुद्दा दर्ता भएका छन् । साउन महिनामा परेका मुद्दाहरुमा लिखित निवेदन ८० वटा, टेलिफोनबाट २३ वटा, इमेलबाट ८१ वटा मुद्दा दायर भएको अख्तियार दुरुपयोग अनुसन्धान आयोग सुर्खेतका सूचना अधिकारी दिनेश पौडेलले जानकारी दिए । उनका अनुसार भदौ महिनामा दर्ता भएका एक सय आठ मुद्दामध्ये लिखित निवेदनबाट ५४ वटा, टेलिफोनबाट १० वटा र इमेलबाट ४६ वटा मुद्दा दर्ता भएका छन् ।

कर्णाली प्रदेशका १० जिल्लामध्ये सबैभन्दा बढी दैलेख र सुर्खेतबाट मुद्दा दर्ता भएका छन् । कार्यालयको तथ्यांक अनुसार दैलेखबाट ६५ र सुर्खेतबाट पछिल्लो दुई महिनामा ४८ वटा मुद्दा दर्ता भएका छन् । त्यसैगरी रुकुमपूर्व २४, रुकुमपश्चिम २६, डोल्पा १६, जुम्ला २७, मुगु १५, हुम्ला २८, कालिकोट ३८, जाजरकोट २९ र सल्यान १० मुद्दा दर्ता भएको सूचना अधिकारी पौडेलले जानकारी दिए ।

अख्तियार दुरुपयोग अनुसन्धान आयोग प्रदेश कार्यालय सुर्खेतले कर्णाली प्रदेशका १० जिल्ला र लम्विनी प्रदेशको रुकुमपश्चिम गरी ११ वटा जिल्ला हेर्दै आइरहेको छ ।

यसैगरी गत आर्थिक वर्षमा कर्णाली प्रदेशमा दुई हजार सात सय ७० मुद्दा परेका थिए । जसमध्ये एक हजार पाँच सय ५९ मुद्दा फर्छौट भएको र एक हजार दुई सय ११ मुद्दा सरेर आएको कार्यालयले जनाएको छ ।

चालू आर्थिक वर्षका लागि एक हजार पाँच सय १३ मुद्दामध्ये एक सय ७६ मुद्दा फर्छौट भएको छ भने अब एक हजार तीन सय ३७ मुद्दा फर्छौट हुन बाँकी रहेको छ । जसमध्ये एक हजार दुई सय ११ वटा मुद्दा गतवर्षको जिम्मेवारी सरेर आएका हुन् ।