खोज

बुटवल, २ असोज ।

झरना रनिङ शिल्ड फुटबल प्रतियोगिताको ३६ औं संस्करण आज सुरु हुँदैछ । झरना स्पोर्टर्स क्लबको आयोजनामा स्वर्गीय खगी गुरुङसेनीको पुण्य स्मृतीमा हुने प्रतियोगिताको उद्घाटन खेल बुटवलको गोर्खा ब्याईज क्लब र गतवर्षको विजेता भुपु सैनिक युवा क्लबबिच हुने भएको छ ।

प्रतियोगिताको सबै तयारी पूरा भएको क्लबका अध्यक्ष धनेन्द्र पौडेलले बताए । ‘हामी खेलमैदानमा रहेर सबै तयारी पुरा गरेका छौ’— उनले भने । तिलोत्तमा नगरपालिकाको कुन्जलापुरस्थित उमा आधारभुत विद्यालयको खेल मैदान आकर्षक बनाइएको छ । करिब चार–पाँच महिना अघिदेखि मैदानलाई हरियाली बनाउने क्लबका पदाधिकारीहरु आफै खटिएका हुन् । ‘कुनै किसिमबाट ग्राउण्डमा कमजोरी छैन’—उनले भने । आयोजकले यसपटक खेलमैदानदेखि उत्कृष्ट टिमहरु, अतिथि सत्कार, पार्किङ ब्यवस्थापनलाई ध्यान दिएको उनले बताए । ‘विजेता टिमले नयाँ डिजाईन गरिएको आकर्षक रनिङशिल्ड चुम्ने छन्’—उनले भने ।

लाहुरेहरुका दशैं खेल हुँदै ‘झरना कप’ सम्मको इतिहास

रुपन्देहीको तिलोत्तमा नगरपालिकाको कुन्जलापार्क क्षेत्र लाहुरे बस्तीको रुपमा चिनिन्छ । सो क्षेत्रका अधिकांश बासिन्दा भारत र युके आर्मीमा जागिरे छन् । झरनाको इतिहास यिनै लाहुरेबाट सुरु भएको मानिन्छ । करिब २०२९ सालतिर उमा निमाविको मैदानमा केही लाहुरेहरु विदेशबाट दशैंमा छुट्टीमा फर्किदा फुटबल खेल्ने गर्थे । लाहरेहरुले जुत्ता, फुटबल ल्याउने प्रचलन रहेको थियो । त्यही फुटबललाई मिलेर खेल्दाखेल्दै वि.सं. २०३९ सालमा संगठित भए । दशै विशेष प्रतियोगिताका रुपमा झरना कप खेलिन थाल्यो । भारत नौतनहवा, सुनौलीबाट कप, शिल्ड, मेडल ल्याएर दशैंमा खेल्ने गरेको क्लबका पूर्वअध्यक्ष लोक पुन बताउँछन् । ‘बिस्तारै फुटबलको क्रेज बढ्दै गयो’—उनले भने । क्लव ब्यवस्थित बन्दै प्रतियोगितालाई ब्यवस्थित गर्ने काम भएको उनले बताए । अहिलेको अवस्थासम्म आउन क्लबका संस्थापक, पूर्वअध्यक्षहरुको धेरै ठुलो योगदान रहेको उनी बताउँछन् ।

वि.सं. २०५२ मा जिल्ला फुटबल संघमा दर्ता भयो । क्लबको उपलब्धिलाई केलाउँदा जिल्ला लिगको च्याम्पियन, एन्फा फुटबल लिगमा सहभागिता, प्रदेशस्तरीय फुटबलमा दोस्रो, विगत २ वर्षअघिसम्म प्रदेशभरिकै धेरै प्रतियोगितामा भाग लिएर सफलता हासिल गरेको छ । यतिमात्र होईन राष्ट्रिय खेलाडीहरु निशान सुनार, शिव गुरुङ (डेभिड), शेरबहादुर गुरुङका साथै भारतीय आर्मीको राष्ट्रिय टिममा खेल्ने धेरै खेलाडीहरु उत्पादन गरेको उनी बताउँछन् । अहिले पनि भारतकै राष्ट्रिय टिममा खेलेका खेलाडीलाई प्रशिक्षकका रुपमा भित्र्याएर ग्रासरुट विकासमा क्लब लागेको छ । प्रशिक्षक निल प्रसाद छन्त्यालले ४ वर्षदेखि साँझमा खेलाडीहरुलाई प्रशिक्षण गराउँदै आएका छन् । क्लब खेलमात्र नभई सामाजिक उत्तरदायित्वमा समेत सधै अग्रसर रहेको छ । शिक्षा, स्वस्थ्यमात्र नभई अन्य समुदायको विकासमा सधै हातेमालो गर्दै अघि बढेको छ । क्लबको अगुवाईमा कुन्जपार्कलाई नमुना पार्क बनाउन सफल भएको छ ।

१ हजार ६ सय दर्शक अट्ने प्याराफिट

झरनामा यसपटक करिब ६ सय अट्ने नयाँ स्थायी प्याराफिट निर्माण भएको छ । यसैगरी १ हजार दर्शक अट्ने अस्थायी प्याराफिट समेत बनाइएको छ । दर्शकको सुविधालाई विशेष चासो दिएर यसपटक छोटो तयारीमा नै १८ लाख रुपैयाँ लागतमा उत्तरतर्फ आकर्षक स्थायी प्याराफिट तयार गरेको क्लबका अध्यक्ष धनेन्द्र पौडेलले बताए । प्रतियोगिता सम्पन्न गर्न २२ लाख खर्च हुने अनुमान रहेको उनले बताए ।

खेल संयोजक विजय पुनले प्रतियोगिताको उपाधि विजेताले नगद ३ लाख ३१ हजार रुपैयाँ, आकर्षक रनिङशिल्ड, प्रमाणपत्र र मेडलबाट पुरस्कृत गरिने बताए । यसैगरी उपविजेता टिमले १ लाख ८१ हजार रुपैयाँ, कप तथा सेमिफाईनलमा पुग्ने दुई टिमलाई जनही नगद २५ हजार रुपैयाँका साथै प्रत्येक खेलमा म्यान अफ दि म्याचलाई ३ हजार ट्रफी,
प्रमाणपत्रबाट पुरस्कृत गरिने उनले बताए । विधागत रुपमा उत्कृष्ट खेलाडीहरुलाई १० हजार र सर्वोत्कृष्ट खेलाडीलाइ १५ हजार रुपैयाबाट पुरस्कृत गरिने उनले बताए ।

प्रतियोगितामा आयोजक झरना स्पोर्ट्स क्लब, सम्पूर्ण युवा क्लब, लिस्नु युवा क्लब, नवयुवा खेलकुद तथा सांस्कृतिक परिवार, न्यू सिर्जना युवा क्लब, गोर्खा ब्याइज क्लब, जनज्योति एफसी, देवदह ब्यायज, फुलबारी गाईज, योग स्टार एफसी, कपिलबस्तु —११, भैरव एफसी, बालिङ युनाईटेड, फर्साटिकर युवा क्लब, सुनौलो संगम युवा क्लब, भुपु सैनिक युवा क्लब गरि १६ टिमले प्रतिस्पर्धा गर्ने उनले बताए । क्लबका पूर्व अध्यक्ष लोक पुनले ब्लड क्यान्सरको उपचार गरिरहेका युवा खेलाडी अंकितलाई सहयोग गर्ने समेत बताए । सवारी पार्किङबाट उठेको शुल्क ‘अंकत बचाउ अभियान’ मा लगाईने हँुदा यसमा सबै अतिथिहरुबाट सहयोग गर्न समेत उनले आग्रह बताए ।