खोज

सुर्खेत, १ असोज ।

वीरेन्द्रनगर नगरपालिका–४, स्थित भैरव माध्यमिक विद्यालय र जन नमुना माध्यमिक विद्यालयका विद्यार्थीहरूले सडक सुधार गर्नुपर्ने माग गर्दै आन्दोलित भएका छन् । उनीहरुले भैरवस्थान स्कुलको गेट नजिकै धर्ना समेत दिएका छन् । उनीहरुले सोमवार दिनभरी स्कुल अगाडि धर्ना दिएका थिए ।

प्रदेशका मुख्यमन्त्री यमलाल कँडेल र विरेन्द्रनगर नगरपालिकाका उपप्रमुख बस्ने घर नजिकैको अवस्था बेहाल रहेको उनीहरुको भनाई छ । जनप्रतिनिधिहरुलाई सडकका्े अवस्थाका बारेमा पटकपटक कुरा राख्दा पनि चासो नराखेपछि धर्ना दिन बाध्य भएको विद्यार्थीहरुको भनाई छ ।

जन नमुना माविका विद्यार्थी नारायण नेपालले दुई वर्षदेखि सडकको अवस्था उस्तै हुँदा सोही ठाउँबाट चुनाव लडेर मुख्यमन्त्री बनेका कँडेल र नगर प्रमुख मोहनमाया ढकालले कुनै चासो नदिएको बताएका छन् ।

‘सडक सुधारका लागि जनप्रतिनिधिले कुनै चासो नदिएपछि आन्दोलन गरेका हौ’ उनले भने, ‘राजधानीभित्रकै व्यस्त सडकको त अवस्था यस्तो छ, यहाँका दुर्गम ठाउँको त कल्पना गर्न सकिदैन ।’

उक्त सडकमा लामो समयदेखि अटो चलाउँदै आएका सुरेन्द्र सुवेदीले यस क्षेत्रमा अटो चलाउनै समस्या रहेको बताए । बाटो बिग्रिएको कारण अटोको टायरलगायतका सामग्री मर्मत गरिरहनुपर्ने अवस्था आउने गरेको बताए ।

स्थानीय हरि अधिकारीले बाटो भारी खाल्डाखुल्डी भएका कारण बिद्यार्थी, सुत्केरी महिला तथा बालबालिकालाई हिंड्डुल गर्न समस्या हुने गरेको बताए । खासगरी गणेश चोकदेखि हस्पिटल हुँदै बांगेसिमल जाने सडकको अवस्था बिग्रिएको अधिकारीले बताए ।

सडक सुधारका लागि मुख्यमन्त्री कँडेल र नगरप्रमुख मोहनमाया ढकालले आएर लिखित सहमति गर्नुपर्ने माग गरेका आन्दोलित विद्यार्थीले माग पूरा नभए कडा संघर्षका कार्यक्रममा उत्रिने चेतावनी दिएका छन् ।

यता वीरेन्द्रनगर नगरपालिका–४, का वडाध्यक्ष शेरबहादुर केसी वडासँग उक्त सडक बनाउन सकिने बजेट नरहेको बताउँछन् । अहिले प्रदेश सरकारबाट नालाको सुधारका लागि बजेट राखिए पनि स्तरोन्नती र मर्मतका लागि बजेट नरहेको जनाए ।