खोज

सुर्खेत,२८ भदौ ।

निरन्तर वर्षाका कारण कर्णाली राजमार्ग लगायत प्रदेशका विभिन्न सडकखण्डहरु पहिरो गएको छ । निरन्तर वर्षाका कारण पहिरो हटाउन सकस भएको छ । पहिरोले सडक अवरुद्ध हुँदा कर्णाली राजमार्ग सञ्चालनमा आउन समस्या देखिएको छ ।

कर्णाली प्रदेश ट्राफिक कार्यालयका अनुसार छिन्चु जाजरकोट सडक खण्ड अन्तर्गत गुर्भाकोट नगरपालिका वडा नम्वर तीनमा बालुवा लेदो सहितको बाढी आएपछि सडक अवरुद्ध भएको छ । त्यसैगरी सुर्खेतको भेरीगंगा नगरपालिकास्थित पैसठी भन्ने स्थानमा भीरबाट ढुंगा खसेका कारण सडक अवरुद्ध भएको छ । त्यसैगरी रुकुम पश्चिमको सानोभेरी गाउँपालिका वडा नम्वर दुई स्थित सहरे भन्ने स्थानमा पहिरो गएको छ भने सल्यानको कालिमाटी गाउँपालिका वडा नम्वर ४ स्थित दाङ—सुर्खेत सडकखण्डमा पहिरो गएका कारण सडक अवरुद्ध भएको छ ।

यस्तै जिल्ला प्रहरी कार्यालय कालिकोटले पहिरो हटाउने कार्यमा समस्या भइरहेको हुँदा सडकको अवस्था बुझेर मात्र यात्रा गर्न अनुरोध गरेको छ । पहिरोका कारण राजमार्ग अन्तर्गत कालिकोटको शुभकालिका गाउँपालिका–१, गगने खोला र एस मोडमा पहिरो खसेको छ । पहिरो हटाउन स्काभेटर गएपनि निरन्तर लेदो आइरहेका कारण हटाउन समस्या भएको प्रहरीले जनाएको छ ।