खोज

सुर्खेत, ९ भदौ ।

प्रहरीले गाडी रोक्न नदिएको भन्दै सुर्खेतका यायतायात व्यवसायीहरुले विरोध गरेका छन् । यात्रु चढाउने विषयलाई लिएर यातायात व्यवसायीहरुले विरोध गरेका हुन् । आज बिहान व्यवसायीहरुले सुर्खेत बसपार्कमा सडकमा चक्काजाम समेत गरेका छन् । प्रहरीले गाडी रोक्न नदिएको भन्दै संयुक्त यातायातले मुख्य सडकमा नै गाडी रोकेर चक्काजाम गरिएको यातायात व्यवसायीहरुले बताएका छन् ।

आज बिहान करिब एक घण्टा बसपार्क अगाडी चार लेनको सडकमा गाडी राखेर चक्काजाम गरेपछि सर्वत्र विरोध भएको छ । स्कुल बस, एम्बुलेन्स समेत आवतजावतमा कठिनाइ हुने गरी संयुक्त यातायातले गाडी जाम गरेको थियो ।

गाडीमा यात्रु चढाउनका लागि बल प्रयोग गर्नुुको साथै यात्रुहरूलाई तानातान गर्ने गुनासो आएको थियो । उक्त गुनासो आएपछि अमानवीय व्यवहार गरेको भन्दै प्रहरी दैनिक रुपमा बिहानैबाट बसपार्कमा खटिएको थियो । बसपार्कमा खटिएका प्रहरीहरुले यात्रु हाल्न नदिएको भन्दै विरोध जनाएका छन् । यता प्रहरीले यात्रुहरुलाई स्वइच्छाले गाडीमा बस्न पाउनुपर्छ भन्छन् भने व्यवसायीहरु एकअर्काबीच प्रतिस्पर्धा गर्दै जबरजस्ती रुपमा यात्रुहरु तानातान गर्ने गर्दछन् ।

यातायात व्यवसायीहरु प्रहरीकै अगाडी यात्रु तानेर हाल्ने जोरबल गरिरहेका हुन्छन् । यातायात व्यवसायीहरु आफ्ना समास्याहरु समाधान गर्न लाग्नुपर्ने बताएका छन् ।

यता जिल्ला प्रहरी कार्यालय सुर्खेतका प्रहरी नायव उपरिक्षक विरेन्द्र विर विश्वकर्माले यातायात व्यवसायीहरुको एक आपसको झगडाले प्रहरीलाई नै हैरानी बनाएको जनाए । यो पुरानो समस्या रहेको र समाधान हुन नसकेको उनले बताए । ‘बसपार्कमा जबरजस्ती यात्रुलाई तान्ने गरेको गुनासोहरु आएपछि हामीले स्वइच्छाले यात्रुहरुलाई जुन्सुकै गाडीमा चढ्न दिनुपर्ने र यसरी तातान नगर्नु भनेर भनेका थियौ’ प्रहरी नायव उपरिक्षक विश्वकर्माले भने, ‘उनीहरुले प्रहरीले हामीलाई सहयोग गरेन भन्ने आरोप लगाउने गरेका छन् ।’ यात्रुहरुलाई जथाभावी रुपमा तान्ने प्रवृत्तिलाई रोक्नको लागि बसपार्कमा प्रहरी परिचालन समेत गरिएको छ ।