खोज

गुल्मी,०८ भदौ ।
गुल्मीको रेसुङ्गा विमानस्थलमा शुक्रबारदेखि पुनः हवाई उडान शुरु भएको छ । मौसम बिग्रिएपछि गत असार १४ गतेदेखि अबरुद्ध बनेको हवाई सेवा आज शुक्रबारदेखि सञ्चालनमा आएको रेसुङ्गा विमानस्थलका स्टेशन प्रमुख सुमन थापाले जानकारी दिएका छन ।
वर्षादको समयमा पानी परिरहने र बाक्लो कुहिरो लाग्ने गरेका कारण सात झण्डै दुइ महिदादेखि हवाई उडान प्रभाबित बनेको थियो । यसअघि साताको चार पटक उडान हुँदै आएको भएपनि केही समयसम्म साताको एक दिन शुक्रबार मात्र रेसुङ्गा–काठमाडौं उडान हुने स्टेशन प्रमुख थापाले बताए ।
नेपाल वायुसेवा निगमको एउटा जहाज ग्राउण्डेट र अर्को अप्रेशनमा रहेको कारण उक्त जहाज नबन्दासम्म सातामा एक पटक मात्र उडान हुने बताईएको छ । शुक्रबार बिहान काठमाडौंदेखि १२ जना यात्रुहरू लिएर रेसुङ्गा आएको उक्त जहाज रेसुङ्गाबाट खाली काठमाडौं फर्किएको थियो ।

जहाज नियमित रूपमा सञ्चालनमा नआएको र मौशम बिग्रिरहने गरेका कारण काठमाडौं जानका लागि सम्पर्कमा रहेका कतिपय व्यक्तिहरूले पछिल्लो समय सम्पर्क नगरेपछि जहाज रित्तै फर्किएको हो । जहाजमा उडान गर्नका लागि रेसुङ्गा–काठमाण्डौ र काठमाण्डौ–रेसुङ्गाका लागि यस अघि यात्रुहरूको चाँप बढ्ने गर्दथ्यो । गुल्मीको रेसुङ्गा विमानस्थलमा नेपाल वायुसेवा निगमको १८ सिट क्षमताको ट्वीनिटर जहाजले उडान गर्दै आईरहेको छ ।
काठमाण्डौबाट बिहान ६ः३० बजे र रेसुङ्गा विमानस्थलबाट बिहान ७ः३० बजे नियमित उडान तालिका छ । सोही तालिका अनुसार निगमले काठमाडौंबाट रेसुङ्गा लागि ७ हजार ५०० रूपैंया र रेसुङ्गादेखि काठमाडौंका लागि ७ हजार ३०० रूपैयाँ भाडादर निर्धारण गरेको छ । गुल्मीमा गत वर्षदेखि व्यावसायीक रूपमा हवाई उडान सुरु भएको हो । रेसुङ्गा विमानस्थलमा दिउसोको समयमा अत्यधिक हावा चल्ने भएका कारण प्राबिधिक दृष्टिकोणले बिहान ११ बजेसम्म मात्र उडान भर्नका लागि उपयुक्त मानिन्छ । पछिल्लो समयमा हवाई उडान शुरु भएसँगै जिल्लामा आउने आन्तरिक एवं वाह्य पर्यटकहरूको संख्यामा समेत बृद्धि हुँदै गएकोे छ । रेसुङ्गा विमानस्थलबाट काडमाण्डौका लागि एक वर्षकोे अबधिमा १ सय २६ उडान भैसकेको छ । रेसुङ्गा विमानस्थल सदरमुकाम तम्घासदेखि ५ किलो मिटरको दुरीमा रहेको छ ।