खोज

गुल्मी, ०७ भदौ ।
गुल्मीको सदरमुकाम तम्घास नजिकै गर्जुरामा रहेको रेसुङ्गा पार्कमा यतिबेला आन्तरिक पर्यटकहरूको चहलपहल बढ्दै जान थालेको छ । धार्मिक एवं पर्यटकीय क्षेत्र रेसुङ्गामा पार्क निर्माण भएसँगै त्यहाँ घुम्न जाने पर्यटकहरूको संख्यामा पनि बृद्धि हुँदै गएको हो ।
गर्जुरा क्षेत्रबाट देखिने सुन्दर हिमश्रृङखलाहरू र मनमोहक रमणीय वनजङ्गलले त्यहाँ पुग्ने जोकोही पर्यटकहरूको मन लोभ्याई रहन्छ । पार्कमा निर्माण गरिएको वाल उद्यान बालबालिकाहरूको लागि मुख्य आकर्षकको केन्द्र बनेको छ । पार्कमा निर्माण गरिएका झुला, पानी पोखरी, भ्यूटावर र पिङ्मा युवादेखि बृद्धबृद्धासम्म रमाई रहन्छन ।

पार्क सञ्चालनमा आएको छ महिनाको अबधिमा रेसुङ्गा पार्कमा एक्काईस हजार नागरिकले भ्रमण गरिसकेका छन । निर्माण सम्पन्न भएको छोटो अबधिमै रेसुङ्गा पार्क आन्तरिक पर्यटकहरूका लागि राम्रो गन्तव्य स्थान बनेको छ । पार्क सञ्चालनमा आएको छ महिनाको छोटो अवधिमै सोँचे भन्दा धेरै मानिसहरूले भ्रमण गरेको रेसुङ्गा नगरपालिकाका प्रमुख प्रशासकीय अधिकृत बाबुराम पल्लीले बताए ।

आर्थिक बर्षको फागुन महिनादेखि पार्क सञ्चालनमा आएकोे थियो । पार्क सञ्चालनमा आएपछि नगरपालिकाले झण्डै ८ लाख रूपैयाँ राजस्व सङ्कलन गरिसकेको प्रशासकिय अधिकृत पल्लीले जानकारी दिए । उनले गत फागुनदेखि असार महिनासम्म अठार हजार र साउन महिनामा तीन हजार गरि कुल २१ हजार आन्तरिक पर्यटकहरूले रेसुङ्गा पार्कको भ्रमण गरेको बताएका छन ।

रेसुङ्गा क्षेत्रलाई गुल्मीको पर्यटकीय हव बनाउन नगरपालिकाले गत वर्षदेखि “जाउँ हिड रेसुङ्गा” अभियान समेत सञ्चालन गरेको छ ।
यो अभियानसँगै पार्कमा घुम्न जानेहरूको संख्यामा बृद्धि हुँदै गएको हो । पार्कको ब्यवस्थापनका लागि नगरपालिकाले चार जना कर्मचारीहरू राखेर त्यसकोे रेखदेख गरिरहेको छ ।

पार्क भ्रमणका लागि रेसुङ्गा नगरपालिकाले बिदेशी नागरिकको हकमा १५०, सर्वसाधारण नागरिकको हकमा ५० रूपैयाँ र बिद्यार्थी तथा जेष्ठ नागरिकको हकमा २० रूपैयाँ शुल्क निर्धारण गरेको छ । सदरमुकाम तम्घासबाट तीन किलो मिटरको दूरीमा कालोपत्र सडकहुँदै रेसुङ्गा पार्कमा सजिलै पुग्न सकिन्छ ।