खोज

गुल्मी, ०३ भाद्र ।
अबिरल वर्षाका कारण अबरुद्ध बनेका गुल्मीका मुख्य मुख्य सडकहरू सुचारु भएका छन् ।
मदन भण्डारी राजमार्ग अन्तर्गत तम्घास–रिडी सडकखण्ड अपरान्हदेखि सुचारु बनेको छ । उक्त सडकखण्ड अन्तर्गत गुल्मीदरबार गाउँपालिका–३ को गौडाकोट–४ को बिरबास र रुरुक्षेत्र गाउँपालिका–१ को रातामाटामा सडक माथिबाट पहिरो खसेपछि शनिबार रातीदेखि उक्त सडक अबरुद्ध बनेको थियो ।

त्यसैगरी रिडी–खज्र्याङ् र रिडी –रुद्रबेणी–वामीटक्सार सडकखण्ड पनि सुचारु बनेको छ । रिडी–रुद्रबेणी–वामीटक्सार सडकखण्ड अन्तर्गत सत्यवती गाउँपालिका–६ उर्लीखोला नजिकै डहरेखोलामा पानीको बहाव बढेपछि सनिबार रातीदेखि सडक अबरुद्ध बनेको थियो । स्थानीय पालीका, प्रशासन र निर्माण व्यवसायीको पहलमा डोजर र एक्साभेटर प्रयोगगरि सडकमा खसेको पहिरो पन्छाएपछि जिल्लाका मुख्य मुख्य सडकहरू पुर्णरूपमा सञ्चालनमा आएको जिल्ला प्रहरी कार्यालय गुल्मीका प्रहरी नायव उपरिक्षक शंकर पोख्रेलले जानकारी दिए । सडक सुचारु भएसँगै बाटोमा अलपत्र परेका लामो तथा छोटो दुरीका सबै सवारी साधनहरू गन्तव्यमा लागेका छन ।

वर्षाका कारण गुल्मीको छत्रकोट गाउँपालिका–५ दुमैमा पहिरोले स्थानीय रामबहादुर बुचाको घर बगाई दिएको छ । बुचाको दुईतले घर बगाउँदा दुइवटा बाख्रा मरेको र कुनै मानवीय क्षति भने नभएकोे प्रहरीले जनाएको छ । वर्षाका कारण जिल्लाको ग्रामिण क्षेत्रका अधिकांस सडकहरू अबरुद्ध छन ।