खोज

नवलपरासी, ३० साउन ।
जिल्लाबाट विद्युत सेवा लिँदै आएका सर्वसाधारणको विद्युत मिटर काटेर/जोडेर साढे ७ करोड बढी असुली गर्ने विद्युत प्राधिकरणले उद्योगले नतिरेका ५० करोड रकम कहिले असुल गर्ला भनेर प्रश्न उठ्न थालेको छ । केही महिना विद्युत नबुझाउने ग्राहकको लाईन काटेर असुली गर्ने विद्युत प्राधिकरणले जिल्लामा विगतमा डेडिकेटेटलाई लिइने चार उद्योगबाट ५० करोड रकम उठाउन बाँकी हुँदा नागरिक समाजले सो प्रश्न उठाएको हो ।

सर्वसाधारणबाट लाईन काटेर सात करोड उठाउने विद्युत प्राविधकरणले ५० करोड असुली कहिले होला ? भन्ने प्रश्न उठ्न थालेको छ । औद्योगिक क्षेत्रका विभिन्न उद्योगहरूले विद्युत महशुल नतिरेको नेपाल विद्युत प्राविधिकरण परासी वितरण केन्द्रले जनाएको थियो । विद्युतको बहुविकल्प दिँदै आएको यो जिल्लाका केही उद्योगले ५० करोड भन्दा बढि विद्युत महशुल नतिरेको केन्द्रले जानकारी गराएको थियो । तर ति रकम अहिले पनि असुली नभएको बताउँदै नागरिक समाजका अध्यक्ष राधेश्याम सिँह सैथवारले मुलुक चलाउनमा प्रत्येक नागरिकको लगानी हुन्छ तर विद्युत प्राधिकरण र सरकारबाट दोहरो नीति देखिन थालेको जनाए । उनले प्रश्न गरे, सर्वसाधारणको लाईन काटेर ७ करोड बढि रकम उठाइयो, उद्योगका ५० करोड कहिले ? विद्युत प्राधिकरण परासी वितरण शाखाका सूचना अधिकारी समेत रहेका इन्जिनिर रामाशंकर शाहका अनुसार गत आर्थिक बर्षमा सर्वसाधारण ग्राहक मध्ये २ हजार ४ सय २८ जनाको विद्युत मिटर काटिएको थियो ।

जरिवाना सहित सो वापत ३ करोड ८१ लाख ४० हजार २४ रुपिया असुल गरिएको थियो । त्यसैगरि विगत बर्षका समेत २ हजार ६ सय ७४ जना ग्राहकको विद्युत लाईन पुनः जडान गरि थप ३ करोड ७७ लाख ८५ हजार २ सय ६६ रुपियाँ असुल गरिएको छ । यसरी कुल रकम ७ करोड ५९ लाख २५ हजार २ सय ९० रुपियाँ असुल भएको छ । गत आर्थिक बर्ष २०८०/०८१ मै विद्युत महशुल नबुझाउने ५ सय १४ ग्राहकलाई कालोसुचिमा राखिएको थियो,जुन अहिले साउन महिना भित्रै २ सय ९५ जनाले विद्युत बुझाएका छन् र उनीहरूलाई कालोसुचीबाट हटाइएको छ । अहिले पटक पटक पत्राचार गरेर किस्ताबन्दीमा भए पनि महशुल बुझाउँदै गर्नुस भनेर जानकारी गराईएको छ, वितरण केन्द्रले दाबी गरेको छ । सर्वसाधारणले थोरै ढिलाई गर्दा विद्युत मिटर काटेर ल्याई हाल्ने विद्युत कर्मचारी उद्योगको मिटर काट्न अहिलेसम्म पर्खाईमै बसेका छन् । विद्युत महशुल त बुझाउनु नै पर्छ, उनले भने,यसका लागि हामी समय सहुलियत,किस्ताबन्दीमा तिर्ने सम्म राहत मिल्न सक्ला तर महशुल नै छुट हुने अवस्था  हुँदैन ।

सूचना अधिकारी शाहका अनुसार बुटवल सिमेन्ट प्रालिले विद्युत महशुल नतिरेका कारण सुनवल नगरपालिका स्थित सो उद्योगको जग्गालाई मालपोत कार्यालयमा रोक्का समेत गराइएको छ । सो उद्योगले आफ्नो उद्योग बन्द गरेर अन्यत्र लगेको छ,त्यहाँ रहेका जग्गा बिक्री गरेर लैजान नपाओस भनेर मालपोत कार्यालयलाई पत्राचार गरि रोक्का गराइ सकिएको सूचना अधिकारी शाहले जानकारी गराए । जिल्लामा अहिले मल्टिनेसनल कम्पनी देखी ठूला र मझौला उद्योगहरू थपिदै गएका छन् ।
उद्योगलाई नै लक्षित गरि जिल्ला भित्र औद्योगिक लाईन समेत विस्तार गरिएको छ । उद्योगलाई आवश्यक पावर विद्युतले सप्लाई दिँदै आएको छ । तर विद्यु्त महशुल नबुझाउनु समस्या भई रहेको केन्द्रले जनाएको छ ।

वितरण केन्द्रले आफ्ना ग्राहकहरूलाई विद्युत आपुर्ति ब्यवस्था चुष्तदुरुष्त बनाउँदै बैकल्पिक विद्युत आपूर्तिको ब्यवस्थानमा लागि परेको छ । विभिन्न प्रसारणलाईन अन्तर्गतका पाँच वटा सब स्टेसनबाट वितरण केन्द्रले बिस्तार गरेको विद्युत आपूर्ति सञ्जाल मार्फत बहुविकल्पको ब्यवस्थापनमा लागेकोे हो । परासी क्षेत्रमा विभिन्न विकल्प भएको विद्युत सञ्जाल बन्दै जाँदा उद्योग खुल्ने क्रम पनि बढदै गएको छ । परासी विद्युत वितरण केन्द्रले ग्राहकलाई सधैभरि पूर्ण भोल्टेज क्षमताको विद्युत आपूर्ति गर्न सकियोस भनेर विभिन्न पाँच वटा विद्युत सब स्टेसनबाट विद्युत आपूर्तिको ब्यवस्थाका लागि प्रसारण लाईन सञ्जाल विस्तार भई रहेको छ । यो परासी क्षेत्रको लागि स्वर्णिम अवसर बन्दै गएको छ, उनले भने, ग्राहकलाई विद्युत आपूर्तिमा समस्या नहोस भनेर एउटा मात्रै नभई पाँच पाँच वटा विकल्प बन्दै छ ।

एउटा विद्युत स्टेसनमा समस्या भए पनि परासी क्षेत्रको विद्युत आपुर्तिमा समस्या आउने छैन्,उनले थपे, किन की यस क्षेत्रमा विद्युत आपुर्ति गर्नका लागि विभिन्न पाँच वटा सव स्टेसनसँग सञ्जाल जोडिदै छ । तिन वटा स्टेसनसँग विद्युत सञ्जाल जोडि सकिएको छ । दुई वटा स्टेसन मध्ये हुकई सब स्टेसन निर्माणाधिन छ । अहिले पनि घरेलु ग्राहकलाई मात्रै दैनिक १० देखि १२ मेगावाट विद्युत वितरण भई रहेका छन् । उद्योगमा पनि दैनिक ६० देखि ७० मेगावाट विद्युत सप्लाई भइरहेको छ । यसरी परासी विद्युत केन्द्रले दैनिक ८० देखी ९० मेगावाट विद्युत वितरण गरि रहेको छ ।

बुटवल ३३ केभिए प्रसारण लाईन,न्यु बुटवल ३३ केभिए प्रसारण लाईनसँग पनि विद्युत जोडिदै छ । ज्यामिरेको ३३ केभिए प्रसारण र गण्डक प्रसारणलाईनसँग पनि विद्युत सञ्जाल जोडिएको छ । नेपालको पूर्वि क्षेत्रबाट पनि केही महिना मै जिल्ला जोडिने छ । नेपालकै विद्युत आपूर्तिमा स्वर्णिम जिल्लाको रूपमा नवलपरासी पश्चिम बन्ने देखिएको छ । यस क्षेत्रमा उद्योग थपिने क्रम दिन प्रति दिन बढेको छ । यहाँका बासिन्दाले किन उद्योगहरूको रोजाई नवलपरासी पश्चिम बन्दै गएको कुरा आश्चर्य लाग्न सक्छ, उनले भने, तर उद्योग सञ्चालकहरूले उद्योगमा विद्युत आपूर्तिको सहज वातावरण देखेर नै आकर्षित बन्दै छन् । तर अहिले तिनै उद्योग विद्युत महशुल तिर्न आनाकानी गर्नु दुर्भाग्य हो ।