खोज

दाङ, २४ साउन ।

दाङको घोराही उपमहानगरपालिका वडा नम्बर १५ की निर्मला वलीले २ वर्ष अघि ८ लाख रुपैयाँ ऋण लिइन । उनलाई तत्काल पैसा आवश्यक परेपछि चिनेजानेका एक आफन्तको सहयोगमा तुलसीपुर १८ सक्राम घर भई हाल घोराही उपमहानगरपालिका वडा नम्बर १५ बिपि चोक बस्ने ५८ वर्षीयको धर्मबहादुर बस्नेतसँग ऋण लिइन ।

ऋण लिएको रकमको ब्याज सावाँ तिर्ने सहमति अनुसार उनले दुई वर्षको अवधिमा २ लाख पचास हजार तिरिसकेकी छन् । तर, उनको नाममा बस्नेत दम्पतिबाट चेक बाउन्सको मुद्दा दायर गर्दै ४२ लाख रुपैयाँको ऋण देखाईएका छन् । ८ लाख ऋण लिएको दुई वर्षमा ४२ लाख रुपैयाँ पुगेपछि उनी न्याय माग्दै प्रहरी कार्यालयमा उजुरी दिइन ।

घोराही १५ विपी चोक बस्दै आएका जगत चौधरीले पनि धर्मबहादुर बस्नेतबाट लिएको २ लाख रुपैयाँ ऋण डेढ वर्षमा ८ लाख पुगेको छ । ऋण दिने अनि विभिन्न दबाव देखाएर खाली चेकमा हस्ताक्षर गराउने अनि चेक बाउन्स देखाएर मुद्दा हाल्ने र मोटो रकम असुलीको धन्दा गर्ने काम बस्नेत दम्पतिले गर्दै आएको प्रहरी अनुसन्धानबाट खुलेको छ ।

सरकारी सेवामा कार्यरत धर्मबहादुर बस्नेत र उनकी श्रीमती ५७ वर्षीया माधवा बस्नेतले करीव ९० जनालाई ऋण दिएर यसरी नै फसाएको पीडितहरुको भनाई छ ।

उनकै घरमा कोठा भाडा लिई बस्नेदेखि धेरैलाई यसरी नै मिटर ब्याजको चंगुलमा फसाएर गैरकानूनी रुपमा रकम उठाउने गरेको पाईएको छ । आफुहरुले लिएको ऋण तिरिरहेको भएपनि अदालतबाट चेक बाउन्सको मुद्दासहित मोटो रकम तिर्न बाँकी भएको जानकारी पाएपछि ३४ जना ऋणीले बस्नेत दम्पतिलाई प्रतिवादी बनाउँदै साउन २० गते जिल्ला प्रहरी कार्यालयमा मुद्दा दायर गरेपछि घटना बाहिर आएको हो ।

पीडितहरुका अनुसार, माधवा बस्नेत र धर्मबहादुर बस्नेतले ऋणीलाई खाली चेकमा दस्तखत गराई बैंकबाट चेक बाउन्स गराएर अरुकै नामबाट मुद्दा दायर गरिएको पाईएको छ । ऋणीले खाली चेकमा दस्तखत गराएर अरुको नामबाट गलत नियतका साथ काम गरेर लाखौँ रुपैयाँको ऋणसहित मुद्दा लगाएपछि पीडितहरु अहिले प्रहरी प्रशासन धाई रहेका छन् ।

आफुहरुले माधवा बस्नेत र धर्मबहादुर बस्नेतबाट ऋण लिएको तर चेक बाउन्सको मुद्दा दायर गर्ने व्यक्तिलाई नचिनेको भन्दै प्रहरीमा उजुरी परेपछि दुवै पक्षलाई साथमा राखेर बयान लिँदा वास्तवमै दुवैले एक अर्कालाई नचिनेको पाईएको प्रहरीले जनाएको छ ।

यसरी दरासयपूर्ण रुपमा काम गर्ने बस्नेत दम्पतिसहित ७ जनालाई प्रहरीले पक्राउ गरी अनुसन्धान अघि बढाएको छ । जिल्ला प्रहरी कार्यालय दाङले अनुचित लेनदेन अर्थात मिटर ब्याज मुद्दामा ७ जना पक्राउ गरेको छ ।

साउन २० गते जिल्ला प्रहरी कार्यालय दाङको प्रहरी टोलीले अनुचित लेनदेन सम्बन्धी कसूर मुद्दामा ७ जना पक्राउ गरेर मुद्धा चलाएको हो ।

पक्राउ पर्नेमा २ जना पुरुष र ५ जना महिलाहरु रहेका जिल्ला प्रहरी कार्यालय दाङका प्रहरी नायव उपरीक्षक रामप्रसाद तिमल्सिनाले जानकारी दिए ।

बस्नेत दम्पतिसहित चेक अनादर गरी मुद्दा दायर गरेका भनिएका घोराही उपमहानगरपालिका वडा नम्बर १५ बस्ने यामाकुमारी बस्नेत, घोराही उपमहानगरपालिका वडा नम्बर ८ बस्ने वर्ष ५१ का तिलकबहादर महरा क्षेत्री, घोराही उपमहानगरपालिका वडा नम्बर १५ प्रगतीनगर टोल बस्ने वर्ष ५३ की पार्वता केसी, घोराही उपमहानगरपालिका वडा नम्बर १५ बस्ने बर्ष ३४ की ममता कुमारी केसी (डिसी), घोराही उपमहानगरपालिका वडा नम्बर १५ बस्ने वर्ष ३७ की ऋषा बोहरालाई प्रहरीले हिरासतमा लिएर अनुसन्धान अघि बढाएको छ ।