खोज

बुटवल, १८ साउन । बुटवलमा रगत अभावलाई रोक्न विभिन्न संघसंस्थाहरुले नियमित रक्तदानलाई जोड दिएका छन । बुटवलमा दैनिकजसो रक्तदान कार्यक्रम चलिरहेको छ । यसैबिच शुक्रबार राष्ट्रिय युवा संघ नेपाल रुपन्देही जिल्ला कमिटिको आयोजनामा वृहत रक्तदान कार्यक्रम सम्पन्न भएको छ । नेपाल रेडक्रस सोसाईटी, रक्त संचार सेवा केन्द्र बुटवलमा नेकपा (एमाले) रुपन्देहीका अध्यक्ष यज्ञ गैरेले रक्तदातालाई ब्लड ब्याग हस्तान्तरण गर्दै कार्यक्रमको उद्घाटन गरे । सामाजिक परिवर्तनका बाहक युवाहरु अब अभियानमा लाग्नुपर्ने सुझाव दिदै उनले रक्तदान समाजिक कार्यमध्येकै उत्कृष्ट काम भएको बताए । रक्तदान गर्दा रक्तदाता आफु स्वास्थ्य भएको प्रमाण समेत हुने हुदा नियमित ३—३ महिनामा रक्तदान गर्ने अभियानमा युवाहरुलाई जोड्न आग्रह गरे ।

कार्यक्रममा संघका अध्यक्ष बिकास जंग बस्नेतले हरेक दुई सेकेन्डमा विश्वभर बिरामीलाई रगतको आवश्यकता पर्ने तथ्याक रहेको भन्दै नियमित अभियन्ताहरुबाट नै यो आवश्यकता पुरा गर्न सकिने बताए । विशेष गरि प्लाज्मा थेरापी, दुर्घटना, रोगबाट पीडित, अविकसित शिशु, जटिल शल्यक्रिया आदि अवस्थामा रगतको एकदमै आवश्यकता पर्दछ ।

कार्यक्रममा राष्ट्रिय युवा संघ नेपाल केन्द्रिय सचिवालय सदस्य एवं लुम्बिनी ईन्चार्ज केशब रोका, केन्द्रिय स्थाई कमिटी सदस्य किरण नेपाल, केन्द्रिय स्थाई कमिटी सदस्य जीवन अधिकारी, एक्सपर्ट फाउण्डेसनका अध्यक्ष रोशन कंडेल, केन्द्रिय सदस्य कल्पना पाडे मगर, श्रद्धा कुवर, केन्द्रिय विज्ञ परिषद उपप्रमुख दिननाथ भट्टराई, संगठनका गण्डकी प्रदेश अध्यक्ष पिताम्बर खनाल, नेपाल एमाले जिल्ला सदस्य नकुल शाही, नेकपा एमाले जिल्ला सदस्य कृष्ण मल्ल ठकुरी, नेकपा एमाले जिल्ला सदस्य दिनेश फुल्लेल, ईश्वर न्यौपाने, केन्द्रिय आयोग सदस्य बिकास गहतराजले स्वास्थ्यका दृष्टिकोणले फाइदाजनक हुने हुदा पनि रक्तदानलाई जोड दिन आग्रह गरे ।

विभिन्न रक्त समुहको अभावलाई मध्येनजर गरि आयोजना गरिएको कार्यक्रममा ६६ युनिट रगत संकलन भएको संघका सचिब दिपेश कंडेलले बताए ।