खोज

बुटवल, ४ कात्तिक ।

सत्तारुढ गठबन्धनबाट रुपन्देही क्षेत्र नम्बर २ प्रतिनिधिसभाका लागि उम्मेदवारी दिएका राजु गुरुङको रिटमाथि सर्वोच्च अदालतमा आज सुनावाई हुने भएको छ । यसअघि कात्तिक २ गते हेर्न नभ्याइनेमा परेको गुरुङको रिटमाथि आज सुनुवाई हुन लागेको हो ।

बैंकको चेक अनादरमा कालोसूचमिा परेकाले उम्मेदवार खारेजीको माग गर्दै उनीविरुद्ध उजुरी पछि निर्वाचन आयोगले गुरुङको उम्मेदवारी खारेज गरेको थियो । त्यसविरुद्ध उनी सर्वोच्च गएका थिए । सर्वोच्च अदालतले असोज ३१ गते प्रारम्भिक सुनुवाई गर्दै अल्पकालीन अन्तरिम आदेश दिंदै उम्मेदवार खारेजीको निर्णय तत्काल कार्यान्वयन नगर्न आदेश दिएको थियो ।

गुरुङ सत्ता गठबन्धनको तर्फबाट नेकपा एकीकृत समाजवादीको कोटामा उम्मेदवार बनेका थिए । निर्वाचन आयोगले प्रतिनिधि सभा सदस्य ऐन, २०७४ को दफा १३ को खण्ड ‘ज’ तथा प्रतिनिधि सभा निर्वाचन निर्देशिका २०७९ को दफा १६ ‘ज’ बमोजिम गुरुङको मनोनयन अयोग्य ठहर गरेको थियो । प्रतिनिधि सभा निर्वाचन ऐन २०७४ को दफा १३ मा उम्मेदवारको अयोग्यतासम्बन्धी प्रावधान उल्लेख गरिएको छ । सोही दफा १३ को खण्ड ‘ज’मा प्रचलित कानूनबमोजिम कालोसूचीमा रहेकोमा सो अवधिभर उम्मेदवार बन्नका लागि अयोग्य हुने उल्लेख छ ।