खोज

गुल्मी, १५ साउन ।
विगत एक महिनादेखि गुल्मीको रेसुङ्गा विमानस्थलमा हवाई उडान हुन सकेको छैन । वर्षादको समयमा पानी परिरहने र बाक्लो कुहिरो लाग्ने भएका कारण गत असार १४ गतेदेखि उडान सेवा अबरुद्ध बनेको रेसुङ्गा विमानस्थलका स्टेशन प्रमुख सुमन थापाले बताएका छन ।
साताको तीन पटक नियमित उडान हुँदै आएकोमा नेपाल एयरलाइन्सले प्रतिकुल मौसमका कारण उडान गर्न नसकेको हो । हवाई उडानका लागि रेसुङ्गा ‐काठमाण्डौ र काठमाण्डौ–रेसुङ्गा आवतजावत गर्न टिकट बिक्री गर्ने काम भने जहाज नआएपनि रोकेको भने छैन । टिकट काटे पनि मौसम खराब भएपछि यात्रुहरूलाई उडान नहुने भन्दै खबर गर्ने गरिन्छ ।

यात्रुहरूको चापका कारण साताको तीन पटक यहाँ उडान हुँदै आएको थियो । मौसममा सुधार नआउँदासम्म उडान गर्न समस्या परेको र यो समस्या साउन महिनाभर रहन सक्ने विमानस्थलका स्टेशन प्रमुख थापाले बताए । गुल्मी–काठमाण्डौका लागि नेपाल वायुसेवा निगमको १८ सिट क्षमताको ट्वीनिटर जहाजले उडान गर्दै आईरहेको छ । काठमाण्डौबाट बिहान ६ः३० बजे र रेसुङ्गा विमानस्थलबाट बिहान ७ः३० बजे नियमित उडान तालिका तोकीएको छ ।
नेपाल एयरलायन्सले रेसुङ्गादेखि काठमाडौंका लागि ७ हजार ३०० र काठमाडौंबाट रेसुङ्गा लागि ७ हजार ५०० रूपैयाँ भाडा निर्धारण गरेको छ । जिल्लामा गत एक वर्षदेखि व्यावसायीक रूपमा नियमित रूपमा हवाई उडान सुरु गरिएको हो ।

रेसुङ्गा विमानस्थलमा दिउसोको समयमा अत्यधिक हावा चल्ने भएका कारण बिहान ११ बजेसम्म मात्र उडान गर्न सकिने बताईएको छ । पछिल्लो समयमा हवाई उडान शुरु भएपछि गुल्मी जिल्लामा आउने आन्तरिक एवं वाह्य पर्यटकहरूको संख्यामा पनि बृद्धि भएको छ ।
रेसुङ्गा विमानस्थलबाट काडमाण्डौका लागि एक वर्षकोे अबधिमा १ सय २५ वटा उडान भएको छ । सदरमुकाम तम्घासदेखि ५ किलो मिटरको दुरीपछि सजिलैसँग रेसुङ्गा विमानस्थल पुग्न सकिन्छ ।