खोज

बुटवल, १४ साउन । विश्व हेपाटाईटिस दिवसको अवसरमा रोटरी ई क्लब अफ मेडिकोफयुजन हाईब्रिड नेपालले लागू औषध न्युनिकरण सम्बन्धी सचेतना तथा हेपाटाईटिस परिक्षण कार्यक्रम गरेको छ । देविनगरस्थित आशा फाउण्डेसन (लागुपदार्थ, मद्यपान उपचार तथा पुर्नस्थापना केन्द्र) मा उपचार गरि राखेकाहरुलाई लक्षित गरि एक दिने लागूऔषध न्युनिकरण सम्बन्धी सचेतना कार्यक्रम तथा हेपाटाईटिस बि परिक्षण गरिएको हो ।

कार्यक्रममा क्लबका डा बिक्रम काफलेले लागु औषध प्रयोगकर्ताको नेपालको तथ्याक र बढ्दो अवस्थाको बारेमा प्रकाश पार्दै यसको न्युनिकरणमा पुर्नस्थापना केन्द्रको योगदानबारे बताए । विभिन्न कारणबाट लागुऔषधमा फस्न पुगेका युवाहरुलाई सुधार भएका धेरै घटनाहरु रहेको भन्दै उनले कारणको खोजी गरि समस्या समाधानमा लाग्नुपर्ने सुझाव दिए । लागुऔषधको प्रयोगले हुने शारीरिक, मानसिक र सामाजिक असरको बारेमा छलफलसंगै लागुऔषध तथा मद्यपानको अत्याधिक प्रयोग एक मानसिक समस्या भएको भन्दै उनले अन्य रोगजस्तै उपचार गरेमा ठिक हुने बताए ।

कार्यक्रममा डा मनिष विश्वकर्मा र डा साहिल भुषालले हेपाटाईटिस बि सर्नुका कारणहरु र यसबाट बच्ने उपायको बारेमा सहभागीहरुलाई जानकारी दिएका थिए ।

कार्यक्रममा केन्द्रका विजय बस्नेतले यसको न्युनिकरणका लागि स्वयं ब्यक्ति, परिवार, समाजबाट सहयोग जरुरी रहेको बताए । समाज सुधारको महत्वपूर्ण माध्यमका रुपमा संचालन भएका पुर्नस्थापना केन्द्रबारे सबै संघसस्थाहरु सहकार्य र सकारात्मक सहयोग जरुरी रहेको बताए । ए वन हेल्थ तथा केपिएल डाईग्लोस्टिकको प्राविधिक सहयोगमा केन्द्रमा रहेका २५ जनाको रगत संकलन गरि परिक्षण गरिएको छ ।