खोज

गुल्मी, ३ कात्तिक ।

गुल्मीको जिल्ला प्रशासन कार्यालयमा यतिबेला नागरिकता बनाउनेहरुको अत्यधिक भीड बढ्दै गएको छ । गत सातादेखि जिल्ला प्रशासन कार्यालय गुल्मीमा सेवाग्राहीहरुको चाँप दिनानुदिन बढ्दै गएसँगै बिहानैदेखि कार्यालय परिसरमा मानिसहरुको लामो लाईन देख्न सकिन्छ । नागरिकता र राहदानी बनाउन गाउँगाउँदेखि आएका सेवाग्राहीहरुलाई व्यवस्थापन गर्न जिल्ला प्रशासन कार्यालयलाई पनि थप सास्ती व्यहोर्नु परेको छ । चाडबाडको समयमा अधिकांस मानिसहरु घर आउने र त्यही मौका छोपेर सरकारी कार्यालयमा बाँकि कामकाज समेत फत्ते गरेर फर्कने भएका कारण यो समयमा प्रशासनमा सेवा ग्राहीहरुको भीडभाड बढेको हो ।

विगतमा दैनिक सरदर ४० देखि ५० वटा नागरिकता वितरण गर्दै आएको प्रशासन कार्यालयमा आजकल एकै दिन १६४ वटासम्म नागरिकता बनेको गुल्मीका प्रमुख जिल्ला अधिकारी पुण्यविक्रम पौडेलले जानकारी दिएका छन् । कार्यालयमा आउने सेवाग्राहीहरुको चाँप बढेपछि अन्य कार्यालयवाट थप कर्मचारीहरु झिकाएर जनतालाई सहज तरिकावाट सेवा प्रवाह भैरहेको प्रमुख जिल्ला अधिकारी पौडेलले बताए ।

कार्यालयमा सेवाग्राहिहरुको चाँप बढेपछि जिल्ला प्रशासनले अतिरिक्त समयमा पनि जनतालाई सेवा प्रवाह गरिरहेको बताएको छ । सेवाग्राहीले दुःख पाउन नपरोस् भनेर बिहान ७ बजेदेखि बेलुकी ८ बजेसम्म पनि कार्यालयवाट सेवा प¥यराईरहेको सहायक प्रमुख जिल्ला अधिकारी हरिप्रसाद गौरेले बताए । जिल्ला प्रशासन कार्यालयले सेवाग्राहीहरुको भीड बढेपछि प्रत्येक फाँटहरुमा एकै ठाउँवाट सम्पूर्ण सेवा प्रवाह गर्न सुरु गरेको छ । मानिसहरुलाई सानो कामका लागि निवेदन र फाराम बोकेर हस्ताक्षरका लागि कोठाकोठामा धाउन नपरोस् भन्ने उद्देश्यले उनीहरुलाई एउटै झ्यालबाट सेवा प्रवाह गर्न सुरु गरेको बताईएको छ । सम्बन्धित फाँटका प्रमुखहरु यतिबेला फाँटमै बसेर सेवाग्राहीहरुको कागजातमा हस्ताक्षर गर्न थालेपछि सेवाग्रहीहरुलाई पनि थप सजिलो भएकोे छ ।

नागरिकतासँगै राहदानी बनाउन आउने मानिसहरुको संख्या पनि दिनहुँ बढ्दै भएको छ । जिल्ला प्रशासन कार्यालयवाट दैनिक ६० भन्दा धेरैले राहदानीको लागि फाराम भर्दै आईरहेका छन । राहदानी बनाउन आउने सेवाग्राहीको चाँप बढेपछि कार्यालयले टोकन प्रणाली लागु गरेको छ । मानिसहरु हातमा टोकन समातेर राती अवेरसम्म पनि आफ्नो पालो पर्खेर काम सकेपछि मात्र घर फर्कने गर्दछन । धेरै भिड बढेपछि कार्यालयले पछिल्लो दिनको लागि दिने टोकन समेत अघिल्लो दिनमै वितरण गर्न शुरु गरेको छ ।

चाडवाड सुरु हुनु अघि सामान्य मात्रमा सेवा ग्राहीहरुको उपस्थिति हुने जिल्ला प्रशासन कार्यालयमा आजभोलि दैनिक तीन सय मानिसहरु नागरिकता, राहदानी, प्रतिलिपि र अन्य सिफारिसका लागि विहान ७ वजेदेखि दिनहुँ लाईनमा बसेका हुन्छन् । कार्यालय समय सुरु हुनु अगाडि उनीहरु आफ्नो पालो चाँडै लगाएर काम फत्ते गरि घर फर्कने आशमा हातमा नागरिकताको सिफारिस बोकेर घण्टौसम्म लाईनमा बसेर पालो कुरिरहेका हुन्छन् ।

त्यसैगरी प्रशासन कार्यालयमा नागरिकताको प्रतिलिपि लिने र अभिलेख प्रमाणित गर्न आउने मानिसहरुको संख्या पनि यो पटक विगतमा भन्दा धेरै छ । दशै तिहार अगाडि दैनिक १० देखि १५ जनाले नागरिकताको प्रतिलिपि लिने गरेकोमा हाल दैनिक सरदर ५० जनाले प्रतिलिपि बनाएर फर्कने गरेको प्रशासकीय अधिकृत ज्ञानकुमारी भुसालले बताएकी छन् । जिल्लामा ७८ वर्षदेखि ८० वर्षसम्मका वृद्धवृद्धाहरु पनि नागरिकता र राहदानी बनाउनका लागि आउने गर्दछन् ।