खोज

नेपालगञ्ज, १२ साउन । नेपालगन्जको भेरी अस्पतालले शनिबार १३४ औं वार्षिकोत्सव मनाएको छ । प्रतिनिधि सभाका सांसद किशोरसिंह राठौरले औपचारिक कार्यक्रमको उद्घाटन गर्दै आम नागरिकलाई सरल र सहज स्वास्थ्य सेवा पुग्ने गरि काम गर्न सुझाव दिए । अस्पतालको भौतिक पूर्वाधार विकासमा सबै एक भएर लाग्नुपर्ने उनले बताए । संवेदनशिल अस्पतालमा सेवा दिने चिकित्सकहरु चनाखो हुन आग्रह गर्दैै उनले सबै अस्पतालमा घट्ने घटनालाई एउटै डालोमा राख्न नहुने उनले बताए ।

लामो ईतिहास बोकेको भेरी अस्पताल पूर्वाधार विकासमा सुधारसंगै सेवा प्रवाहलाई पनि विशिष्टिकृत बनाउँदै लगेको अस्पतालका मेसु डा.प्रकाश थापाले बताए । मुटुरोगीहरुलाई लक्षित गरि एन्जियोग्राफी, एन्जियोप्लाष्टी, पेसमेकरको सेवा अस्पतालले दिइरहेको उनले बताए । यसैगरि अस्पतालमा कार्डियो, क्याथ ल्याब सहितको सुविधा भएका सीमित अस्पताल पर्ने उनले बताए ।

यसैगरि भेरी अस्पतालमा विशिष्टिकृत सेवा अन्तरगत न्यूरो सेवा पनि दिइरहेको छ । मेसु थापाले अन्य अस्पतालको तुलनामा करिब चार गुणा कम शुल्कमा न्यूरो सम्बन्धि शल्यक्रिया भइरहेको बताए । अस्पतालमा मेडिसिन, सर्जरी, छाला रोग, अर्थोपेडिकतर्फका बिरामीहरु बाहिर रिफर गर्नुपर्ने अवस्था नरहेको उनले बताए । ‘विशिष्टकृत सेवाका लागि ठाउँको अभाव छ ।’—उनले भने । पछिल्लो वर्षमा अस्पतालमा डायलाइसिस सेवा पनि विस्तार भएको छ । तीन वटा मेसिनबाट दिनमा दुई सिफ्ट सञ्चालन गरेर हप्तामा १८ जनाले सेवा पाइरहेकोमा अहिले ६ वटा मेसिनबाट दिनमा तीन सिफ्ट सञ्चालन गरी हप्तामा ५४ जनाले सेवा पाइरहेका छन् ।

अस्पताल विकास समितिका अध्यक्ष बीरेन्द्र शाहले आफु नेतृत्वमा आईसके पछि अस्पतालको सेवा बिस्तारको काम अघि बढाएको दाबी गरे । थारु समुदायलाई प्रभावित पारेको सिकलसेल तथा थालेसिमियाका बिरामीलाई चिकित्सकको पूर्जा अनुसार निःशुल्क औषधि उपचार, निःशुल्क आकस्मिक औषधि उपचार, ओसिएमसी निःशुल्क औषधि उपचार र अस्पतालको इन्डोरमा भर्ना भएका बिरामीको लागि कुनै लक्षित वर्गमा नपर्ने तर औषधोपचार गराउन नसक्ने बिरामीहरुलाई समेत सम्बन्धित चिकित्सक र मेसुको सिफारिसमा निःशुल्क औषधि उपचार सेवा अस्पताल फार्मेसीले प्रवाह गर्दै आएको उनले बताए । औषधि तथा औषधिजन्य सामग्री एमआरपी मूल्यमा खरिद हेरेर १० देखि ३० प्रतिशत भन्दा बढीसम्म सहुलियत दिएर बिरामीलाई विक्री वितरण गर्ने गरिएको छ ।

कार्यक्रममा लुम्बिनी प्रदेशका मन्त्री बादशा कुर्मी, लुम्बिनी प्रदेशका सांसद रत्न खत्री, काँग्रेस बाँकेका उपसभापति गोपालप्रसाद अधिकारीले अस्पतालको पूर्वाधारसंगै विशिष्टिकृत सेवालाई अझ परिस्कृत बनाउन सुझाव दिए । कार्यक्रममा विभिन्न बिधामा उत्कृष्ट हुने ब्यक्तिलाई पुरस्कार तथा प्रमाणपत्र प्रदान गरिएको थियो ।