खोज

बुटवल,९ साउन ।
देविनगरस्थित नेपाल अपांग आश्रमले अभाव खेप्दै आएको छ । समाजका विभिन्न दाताहरूको सहयोगमा आश्रितलाई दैनिक गुजारा चलाउन कठिनाई उत्पन्न भएको हो । शुभ जन्मदिवस, विवाह उत्सव, पितृकार्य र संघसंस्थाहरूको सहयोगमा आश्रम चल्दै आएको नेपाल अपांग आश्रमका अध्यक्ष डोल बहादुर रामदामले बताए । ‘दैनिक ३/४ जना सहयोग लिएर आउनुहुन्छ ।’—उनले भने ।
स्थानीय सरकारबाट प्राप्त जग्गामा विभिन्न दाताहरूको सहयोगमा पूर्वाधार निर्माण भएको उनले बताए । आश्रममा ३ वर्षदेखि ६० वर्ष उमेरसम्मका ३५ जना अपांगता भएका आश्रित छन । जसको लालनपालन उनको अगुवाइमा भैरहेको छ । आफु पनि अपांगता भएका उनी जसोतसो सहयोग जुटाएर खाना र लत्ता जुटाउने गरेका छन । ‘मासिक ७५ हजार रूपैयाँ खर्च हुन्छ ।’—अध्यक्ष रामदामले भने । ससाना बच्चाहरूलाई के खुवाउने भन्ने पिरलो हुने उनले सुनाए । आश्रमका केही युवाहरू सरसफाईका सामग्री उत्पादन गरेर बजारमा बिक्री गर्छन । त्यसबाट समेत थोरै आम्दानी हुने गर्दछ । ‘दैनिक गुजारा चलाउन कठिन छ,’—उनले भने । आश्रमको श्रोतका रूपमा ५ लाख रूपैयाँको अक्षयकोषको ब्याज मुख्य हो ।

साना बालबालिकाहरू सामुदायिक र निजी विद्यालयमा अध्ययनरत छ । सरकारबाट सहयोगका लागि धेरै कोशिस गरेको भएपनि सुनुवाई हुन नसकेको उनले बताए ।

यसैबीच लुम्बिनी प्रादेशिक अस्पतालका वरिष्ठ युरोलोजिष्ट डा. बिरेन्द्र यादवले आफ्नो जन्मदिन देविनगरस्थित नेपाल अपांग आश्रममा सहयोग गरेका छन । चिकित्सा पेशासंगै सामाजिक उत्तरदायित्वमा अग्रसर यादवले आफ्नो जन्मदिनमा नगद, खाद्यान्न, वितरण गरेका हुन । एक समारोहका बिच नेपाल अपाङ आश्रमका अध्यक्ष डोल बहादुर रामदामलाई उनले सामग्री हस्तान्तरण गर्दै आगामी दिनमा आश्रममा थप सहयोग र स्वास्थ्य परिक्षणका कार्यक्रम ल्याउने प्रतिबद्धता जनाए ।