खोज

गुल्मी,९ साउन ।
निर्माण व्यवसायीलाई भवन निर्माण गरेको रकम समयमा भुक्तानी दिन नसक्दा गुल्मीमा अस्पताल भवन अलपत्र परेको छ । निर्माण सम्पन्न गरेको एक वर्ष भन्दा लामो समयसम्म पनि निर्माण व्यवसायीले स्वास्थ्य मन्त्रालयबाट पठाउनुपर्ने रकम समयमा पालिकामा नपठाएका कारण रकम भुक्तानीमा समस्या परेको हो ।

जिल्लाको गुल्मीदरबार गाउँपालिकामा एक वर्षअघि निर्माण सम्पन्न भएको पन्ध्र शैयाको अस्पताल भवन यतिबेला बेवारिसे अबस्थामा छ । जिल्लाका कतिपय पालिकाहरूमा निर्माण व्यवसायीले समयमा काम नगर्दा भवन निर्माणको काम अलपत्र परेको अबस्था छ । तर गुल्मीको गुल्मीदरबार गाउँपालिकामा भने निर्माण सम्पन्न भएको भवनको रकम भुक्तानी गर्न नसक्दा प्रयोगमा आउन सकेको छैन ।

बिकोई अर्जुन न्यूलिजा जेबीद्वारा १२ करोड ९४ लाख ५६ हजार लागतमा गत वर्ष तोकिएको अबधिमै आफूहरूले भवन निर्माण कार्य सम्पन्न गरेको अर्जुन बिल्र्डस एण्ड कन्र्टक्सनका सञ्चालक विजय खनालले बताए । गाउँपालिकाले तत्काल भवन निर्माणको सबै रकम भुक्तानी नदिए पनि सम्पन्न भएको भवन बुझ्नका लागि पटक पटक आग्रह गरेको खनालले बताएका छन ।

‘पालिकालाई पटक–पटक भवन बुझ्न आग्रह गर्दै आएका छौं, निर्माण सम्पन्न भएको एक वर्ष भन्दा पनि लामो समय भयो, बर्षाका कारण पर्खाल भत्कीएर थप २२ लाख खर्च भयो, भवनको रेखदेख गर्ने पनि कोही भएन, रेखदेख नहुँदा सोलार, ढोका लगायतका सामानहरू बिग्रीएका छन, बुझाउँछु भन्दा पनि सुख पाईएन, हामीलाई त निल्नु न ओकल्नु जस्तो भयो’ निर्माण व्यवसायी खनालले भने ।

गुल्मीदरबार गाउँपालिका–३ को धुरेलडाँडामा पन्ध्र शैयाको अस्पताल भवन गत एक वर्ष अघिनै निर्माण सम्पन्न भएको हो । बाहिरबाट हेर्दा निकै आकर्षक देखिने उक्त भवनको नियमित रूपमा रेखदेख हुन नसक्दा थप समस्या उत्पन्न भएको बताईएको छ । निर्माण व्यवसायीले उक्त भवनको एक करोड २० लाख रूपैंया भन्दा बढी रकम अझै भुक्तानी पाउन बाँकी छ ।

भवनको रकम निकासा गर्नका लागि पालिकाबाट सम्बन्धित निकायमा पटकपटक पत्राचार गर्ने काम भइरहे पनि स्वास्थ्य मन्त्रालयबाट समयमै त्यसको सुनुवाई नभएको गुल्मीदरबार गाउँपालिका अध्यक्ष सरोजकुमार थापाले बताए । ‘माथि मन्त्रालयबाट रकम आउन ढिला गरेपनि अब पालिकाबाट थोरै–थोरै रकम भएपनि तिर्दै गरेर भवन बुझ्ने विचारमा छौं’ अध्यक्ष थापाले भने । जिल्लाका अन्य स्थानीय तहमा भने पन्ध्र शैयाका अस्पताल भवन निर्माणको काम कछुवा गतिमा छन ।