खोज

भैरहवा, १ कात्तिक ।

राप्रपाका केन्द्रीय सल्लाहकार समितिका संयोजक तथा पुर्व गृहमन्त्री निरन्जन थापाले निर्वाचनमा दुई खालको गठबन्धन भएको बताउँदै सत्तारुढ पाँचदलीय गठबन्धनलाई मत दिए खेर जाने बताएका छन् ।

“त्यो पात्र को को हो प्रधानमन्त्री क्लियर नै छैन । माधव नेपालले आफ्नै प्रधानमन्त्रीलाई फालिदिनुभयो । प्रचण्ड कहिले कता कहिले कता हुनुहुन्छ । त्यस्तो गठबन्धनलाई मत दिएर काम लाग्दैन’–थापाले भने–‘ पाँच दलको भावी प्रधानमन्त्री को हो ? थाहा छैन, तर हाम्रो तीन दलको प्रधानमन्त्री केपी ओली नै हो ।’

झण्डै तीन वर्ष आफू गृहमन्त्री भएको बताउँदै पूर्व गृहमन्त्री थापाले बिस्तारै दिपक बोहोरालाई गृहको ब्रिफिङ गर्न थालेको बताएका छन् । नेपाली कांग्रेसका केन्द्रीय सदस्य तथा गृहमन्त्री बालकृष्ण खाँणलाई कटाक्ष गर्दै थापाले रुपन्देहीमा तक्माको बाढी नै आएको बताए ।

“आज भोली तक्माको धेरै बाढी आएको छ । रूपन्देही क्षेत्र नं ३ मा बाढी नै आएको छ । हामी सरकारमा आएपछि त्यसरी तक्मा बांड्दैनथ्यौँ । तक्माको आधार हुन्छ हामी त्यसरी बाँड्ने गथ्यौँ । हामी उद्योगलाई सञ्चालन गरेर अगाडि बढाउने त्यस्तो उद्योगपतिलाई तक्मा दिन्थ्यौँ ।’

थापाले भने, ‘नाकामा चोरी निकासी रोक्ने प्रहरीलाई हामी तक्मा दिन्थ्यौँ । सिँचाई नपाएर हाँहाँकार भएको किसानलाई तक्मा दिन्थ्यौँ । पार्टीलाई भोट दिन्छ भनेर हामी कदापी तक्मा दिँदैनौँ ।’ रुपन्देही जिल्लामा दिपक बोहोराले विकासको काम गरेर देखाएको बताउँदै पूर्व गृहमन्त्री थापाले भैरहवाको विकास र समृद्धिका लागि प्रतिनिधि सभा सदस्यको निर्वाचनमा बोहोरालाई मत दिन आग्रह गरे ।

थापाले भने–‘चाहे भैलो भुजा भन्नुस । उहाँ पर्यटन मन्त्री पनि हुनुहुुन्थ्यो । बाटा घाटा विकासमा उहाँले धेरै काम गर्नु भो उहाँ रैथाने नेता हो । विकास प्रेमि हो प्राकृतिक गठबन्धन हो । हामीले परिपक्व मान्छे उठाएका छौँ त्यसैले हामी चुनाव जित्छौँ ।’

राप्रपाका बरिष्ठ नेता तथा प्रनिधि सभा क्षेत्र नं ३ का उम्मेदवार दिपक बोहोराले युवाहरुको सोँच, पाका पुस्ताको अनुभवलाई मिश्रण गर्दै समाज रुपान्तरणको लागि दिलो ज्यानले लाग्ने प्रण गर्दै यो निर्वाचनमा होमिएको बताए. ।

प्रदेशसभाका उम्मेदवार तुलसी चौधरीले महेन्द्र यादवले स्थानीय चुनावको मतलाई जोड्ने हो भने कांग्रेसको भन्दा हाम्रो १२ हजार मत बढी रहेको भन्दै ३ ख को ७ हजार धेरै मतले चुनाव जित्ने बताए । तीन दलको चुनावी गठबन्धनलाई कसैले पनि हराउन नसक्ने उनले बताए ।

जसपाका नेता तथा प्रदेश सभा सदस्य क्षेत्र नं ३ क का उम्मेदवार महेन्द्र यादवले तीन दलीय गठबन्धनले नै चुनाव जित्ने दाबी गरे । आफूले ६३ साल देखि आन्दोलन गरेको र यो देशमा संघीय लोकतान्त्रिक गणतन्त्र स्थापित भएको, धेरैले नागरिकता पाएको र सेना पुलिसमा आरक्षणको व्यवस्था भएको भन्दै विकास र समृद्धिका लागि मत दिन आग्रह गरे ।