खोज

काठमाडौं,२३ असार । नेकपा माओवादी केन्द्रका सांसद माधव सापकोटाले एमालेलाई गिरीबन्धु टी स्टेट प्रकरणको कालो धब्बा कसरी पखाल्नुहुन्छ भन्दै प्रश्न गरेका छन् ।

प्रतिनिधि सभाको विशेष समयमा बोल्दै एमालेलाई गिरीबन्धु टी  स्टेट प्रकरणको कालो धब्बा कसरी पखाल्नुहुन्छ भन्दै प्रश्न गरेका हुन् ।

कांग्रेस एमालेबीच भएको सम्झौता अहिलेसम्म बाहिर नआएको बताउदै अपारदर्शी सहमति गरेर नयाँ गठबन्धन बनेको र यसले देशलाई स्थीरता नदिने दाबि गरे ।

उनले भने –दिनभरी प्रधानमन्त्रीसँग बसेर स्वर्ग गएपनि सँगै जाने नर्क गएपनि सँगै जाने भन्ने अनि ललितपुरमा आफ्ना नेताहरुलाई सहमतिका लागि पठाउने यो कहाँको नैतिकता हो कमरेड ?

उनले प्रधानमन्त्री र गृहमन्त्रीले भुटानी शरणार्थीको फाइल फेरी खोल्न थालेपछि बेचन झा पक्राउ परेपछि एमाले कांग्रेसका नेताहरु बेचैन भएको र डुंगामा प्वाल परेको देखेको टिप्पणी गरे ।

उनले संबिधानमा प्रधानमन्त्रीले राजीनामा गर्नुपर्छ भनेर नलेखिएको उल्लेख गर्दै प्रधानमन्त्रीले संबिधानमा रहेको व्यवस्था अनुसार नै आफ्नो अधिकारलाई प्रयोग गर्ने बताए । सापकोटाले प्रधानमन्त्री पुष्पकमल दाहाल प्रचण्डले भारत भ्रमणपछि कुनै नेतालाई नभेटेको र कुनै किसिमको सरकार बनाउने छलफल नगरेको दावी गरेका छन् ।

उनले प्रधानमन्त्रीले संसदमा विश्वासको मत लिएपछि संबिधानको धारा ७६ को उपधारा ३ अनुसारको सरकार बन्ने संबिधानमा स्पष्ट व्यवस्था गरिएको बताए ।

सापकोटाले गत असार १७ गते मध्यराति नेकपा एमाले र नेपाली कांग्रेसबीच भएको सम्झौता गोप्य राख्नु अपारदर्शी र अनैतिकत काम भएको टिप्पणी गरेका छन्। दुई वटा दलका बीचमा के कस्ता सम्झौता भए बाहिर आएको छैन भन्दै सापकोटाले मध्यरातमा अमुक व्यक्तिका घरमा गरेको सम्झौता यतिका दिनसम्म गुपचुप राख्नुपर्ने कुरा के डरले काम गरेको छ सबैभन्दा पहिलो अपारदर्शीता, अनैतिकता त्यहाँबाट सुरु भएको छ भन्दै कांग्रेस र एमालेलाइृ ब्यङग्य गरे ।

साथै, उनले संसदलाई स्थिर बनाउने भनेर भएको सम्झौतालाई विश्वास गर्न नसकिने पनि बताए।

उनले एमाले र कांग्रेसले जनतालाई ढाँट्ने काम गरिरहेको पनि बताए।