खोज

गुल्मी, २२ असार । गुल्मीमा पहिरोमा पुरिएकी एक महिलालाई जीबितै उद्वार गरिएको छ । जिल्लाको रुरुक्षेत्र गाउँपालिका ३ अन्तर्गत थोर्गाको ठाँटीमा सनिबार बिहान स्थानीय उजेली विकको घर पहिरोले पुरेको हो । पहिरोले पुरिएकी ४५ वर्षीया उजेली बिकलाई स्थानीयहरूको सहयोगमा जीवितै उद्वार गरिएको गाउँपालिका अध्यक्ष यदु ज्ञवालीले जानकारी दिएका छन । शनिबार बिहान घर माथिबाट अचानक पहिरो जाँदा उजेलीको घर पहिरोले पुरेको थियो । पहिरोमा पुरिएकी विकलाई स्थानीयहरूद्वारा तत्कालै उद्वार गरिएको थियो । पहिरोमा परि घाईते बनेकी विकको प्राथमिक स्वास्थ्य केन्द्र रिडीमा उपचार भैरहेको र उनी खतरामुक्त रहेको बताइएको छ ।

पहिरोले सत्यवती गाउँपालिका ३ स्थीत गोरडाँडामा स्थानीय रेशम पुलामीको घर पुरेर पूर्ण रूपमा क्षति भएको छ । पहिरोले त्यस टाउँका तीन घरपरिवार बिस्थापित बनेका छन् । विस्थापित परिवारलाई नजिकैको छिमेकीको घरमा राखिएको गाउँपालिका अध्यक्ष टिकाराम पाण्डेले बताए । गुल्मीमा लगातारको वर्षाले मुख्य सडक खण्ड अबरुद्ध भएका छन । पहिरोका कारण गुल्मीको सदरमुकाम तम्घास–रिडी, रिडी–वामीटक्सार, रुद्रबेणी–पूर्तिघाट,तम्घास–अर्खाबाङ् सडक खण्डहरू अबरुद्ध बनेका छन् । तम्घास–रिडी सडक खण्ड अन्तर्गत गुल्मीदरबार गाउँपालिका ४ स्थीत बिरवासमा सडक माथिबाट ठूलो पहिरो खसेपछि शुक्रबार रातीदेखि उक्त सडक अबरुद्ध बनेको हो । रिडी–रुद्रवेणी–वामी टक्सार सडकखण्डको विभिन्न ठाउँमा ठूला–ठूला पहिरो गएको र उल्लीखोलाको डहरे तथा नादेवा क्षेत्रमा खोला बढेका कारण सडक पूर्ण रूपमा बन्द भएको जिल्ला प्रहरी कार्यालय गुल्मीका प्रहरी नायव उपरिक्षक शंकर पोख्रेलले जानकारी दिनु भएको छ । सडक अवरुद्ध हुँदा लामो तथा छिटो दुरीका सवारी साधन र यात्रुहरू थप समस्यामा परेका छन् ।

वर्षाका कारण रुद्रबेणी–पूर्तिघाट सडक अन्र्तगत कालीगण्डकी गाउँपालिकाको भुर्तुङ् र वडा नम्बर ३ स्थित मुल्कामा पहिरोका कारण बिहीबारदेखि अबरुद्ध सडक अझै सुचारु हुन सकेको छैन । पहिरोका कारण इन्द्रेगौडा–तम्घास, चोरकाटे–शान्तिपुर लगायतका एक दर्जन भन्दा बढी सडकहरू अबरुद्ध छन । लगातार वर्षा भैरहेको र बर्षा नरोकिएका कारण सडकमा खसेको पहिरो हटाउन समस्या परेको प्रमुख जिल्ला अधिकारी कृष्ण प्रसाद शर्माले बताए । वर्षा रोकिएपछि मात्र आईतबार बिहानदेखि मुख्य सडकमा गएको पहिरो पन्छाउन शुरु गर्ने उनले जानकारी दिएका छन । वर्षाकै कारण छत्रकोट र सत्यवती गाउँपालिकाको बिभिन्न क्षेत्रमा बिद्युत सेवा अबरुद्ध भएको छ । पहिरोले गुल्मीदरबार गाउँपालिका ४ स्थीत बिरबास बजार नजिकैको रहेको ११ केभिए प्रशारण लाईनको दुई वटा पोल समेत ढलेका कारण बिद्युत सेवा अवरुद्ध भएकोे छ । लगातारको वर्षाका कारण गुल्मीको कालीगण्डकी, रिडी र बडिघाट खोलामा पानीको बहाव बढ्दै गएको छ । वर्षाले जिल्लाको जनजीवन समेत प्रभावित बनेको छ ।