खोज

गुल्मी, १६ असार । बेलुकी राती अबेरसम्म सदरमुकाम तम्घासबाट गएको डबल क्याब जीपवाट स्थानीय ब्यापारीहरूको सामान अनलोड गर्ने काममा व्यस्त थिए भेष बहादुर विक । उमेरले ५५ वषन्त टेक्दै गर्दा पनि परिवारको लागि दैनिक मजदुरी गरि पालनपोषण गर्दै आएका थिए । बेलुकी अबेरसम्म काम गरेर घर फर्केपछि परिवारसँग सँगै खाना खाएर सुतेका विकको परिवार शुक्रवार राती कहिल्यै न ब्यूँझिनी गरि सदाको लागि अस्ताए ।

गुल्मीको मालिका गाउँपालिका ६ स्थीत कँडेलपाटामा शुक्रबार मध्ये रातमा ठूलो बर्षा भैरहेको थियो । वर्षा भएपनि सामान्य होला भनेर कसैले पनि त्यति ठूलो पानी पर्ला भन्ने कल्पना समेत गरेका पनि थिएनन् । सायद त्यही सोंचेर होला विकको परिवार पनि दिनभरको कामको थकानका कारण मस्त निद्रामा थिए । राती अचानक पहिरो आएर घरसहित सबै बढारेर लग्यो तर सायद तिनीहरू मस्त निद्रामा भएर होला ऐयाँसम्म भन्न पनि पायनन् ।

जोखिम ठाउँ नहुँदा नहुँदैपनि पहिरो जादा अचम्म लागेको वडा नं. ६ का वडाध्यक्ष दिपक भण्डारीले बताए । उक्त ठाउँमा मोटर बाटो पनि पुगेको छैन, हेर्दा त्यस्तो पहिरो जाने जस्तो पनि देखिँदैन उनले भने बरु एक पटक मोटर बाटो लैजाने योजना थियो । उनका अनुसार उक्त टोलको दलित बस्तीमा ४ घर थिए, ३ घर सुरक्षित छन् तर घटनाले त्रसित भएको उनले बताए ।

बिडम्बना बिहान छिमेकी सुर्य बहादुरले उठरे हेर्दा पहिरोले घर पुरेको देख्दा निकै अत्तालिए । राती पानी परिहरहेको कारण सबै सुतेको र त्यस्तो जोखिम ठाउँ नभएका कारण कसैले पनि त्यो कल्पना गरेनन् । ‘सामान्य पानी परेहोला भन्ने लागेको थियो, त्यस्तो होला भन्ने कसैकोे पनि कल्पना थिएन’ उनले भने । ‘शुरुमा हेर्दा त पत्याउन नै सकिन तर एकिन भएपछि हतार हतार गर्दै मोबाईल टिपेर वडा सदस्य घनश्याम पराजुलीलाई खबर गरेर जानकारी गराएको हुँ’ उनले भने ।

घर माथिबाट झरेको पहिरोका कारण एकै घरका पाँच जनाले सदाको लागि ज्यान गुमाउन पुगे । ज्यान गुमाउनेमा वर्ष ५५ का भेष वहादुर बिक, नीजकी श्रीमती बर्ष ४८ की सुन्तली बिक, बर्ष २६ की बुहारी सिता बिक, नातीनीहरू बर्ष ८ की सपना विक आठ महिनाकी विपना बिक रहेको जिल्ला प्रहरी कार्यालय गुल्मीले जनाएको छ । पहिरोमा पुरिएकाहरूको शव बिहान स्थानीय र प्रहरीको सहयोगमा खनेर निकालिएको थियो ।
मृतक पाँचै जनाको शव पोष्टमार्टमका लागि शनिबार गुल्मी अस्पताल तम्घास ल्याईएको छ । मृतक भेष बहादुरका तीन भाई छोराहरू रहेको र उनीहरू घटना घटेको जानकारी पाएलगत्तै भारतबाट हिडिसकेका कारण आईतबार उनीहरू आएर मात्र दाहसस्कार गरिने वडाध्यक्ष दिपक भण्डारीले बताए । मालिका गाउँपालिकाले घटना प्रति गरिहो दुख प्रकट गर्दै सोकाकुल परिवारजनमा समवेदना प्रकट गरेको छ । पालिकाले किरिया खर्च लगायत पीडित परिवारलाई पालिकावाट थप आर्थिक सहयोग गर्ने बताएको छ ।