खोज

बुटवल, १३ असार ।

पर्यटन प्रवद्र्धनसंगै सामाजिक कार्यको नारासहित होटल तथा रेष्टुरेन्ट ब्यवसायी संघ रुपन्देहीले आफ्नो २६ औ स्थापना दिवसको अवसरमा रचनात्मक कार्यक्रम गरेको छ । पाल्पा जिल्लाको बसन्तपुरस्थित कामाख्या मन्दिर परिसरमा विहिबार विशेष रक्तदान कार्यक्रमसहित दिवसको शुभारम्भ गरेको हो । लुम्बिनी केबलकार प्रालिको प्रायोजन तथा नवप्रतिभा बचत तथा ऋण सहकारी संस्था लिमिटेडको सहप्रायोजनमा भएको कार्यक्रमको लुम्बिनी केवलकार प्रालिका संचालक समिति सदस्य तेजप्रसाद सुनारले उद्घाटन गरे । त्यस अवसरमा उनले हरेक ब्यावसायिक संघसंस्थाहरुले आफ्नो सामाजिक उत्तरदायित्व निर्वाह गर्नुपर्ने बताए । रुपन्देहीका संस्थाहरुसंग समन्वय र सहकार्य गरी अघि बढ्न केबलकार सधै तयार रहेको उनले प्रतिवद्घता जनाए । धार्मिक पर्यटकलाई लक्षित गरी मन्दिर परिसरमा महाआरती शुभारम्भ समेत गरिरहेको छ ।

कार्यक्रममा संघका अध्यक्ष लेखनाथ भण्डारी स्थापना दिवसमा विविध रचनात्मक कार्यक्रम गरि ३ दिनसम्म मनाउने तयारी भएको बताए । शुक्रबार रामापिथेकस पार्क सरसफाई तथा शनिबार स्थापना दिवसको मुल कार्यक्रम संस्थापक सम्मान, पूर्व अध्यक्षहरुलाई सम्मान घरभाडा छुट गर्ने घरधनीहरुलाई सम्मान, असक्त पूर्व कार्यसमिति सदस्यलाई सहयोग लगायत गरिने उनले बताए ।

कार्यक्रममा होटल तथा रेष्टुरेन्ट ब्यवसायी महासंघ लुम्बिनी प्रदेशका वरिष्ठ उपाध्यक्ष महेन्द्र श्रेष्ठ, संघका पुर्व अध्यक्ष समुन्द्र जिसि, याक ब्रिविङ कम्पनी प्रालिका प्रितम गिरी, नवप्रतिभा बचत तथा ऋण सहकारी संस्था लिमिटेडका अध्यक्ष शिवराज पोखरेल, नेचुरल स्प्रीट नेपाल प्रा लिका लुम्बिनी प्रदेश इन्चार्ज जीवन घिमिरे, प्रालिका मार्केटिङ म्यानेजर प्रज्वल घिमिरे, संघका वरिष्ठ उपाध्यक्ष माधव खनाल, प्रथम उपाध्यक्ष टंक पराजुली, पर्यटन उपाध्यक्ष रोमाकान्त पाण्डे, द्वितीय उपाध्यक्ष प्रेम भट्टराई, महासचिव अर्जुन थापा, सचिव थम्मन भण्डारीले पर्यटन क्षेत्रलाई उकास्ने गरी सरकारको नीतिगत योजना जरुरी रहेको बताए ।

नेपाल रेडक्रस सोसाईटी, रक्तसंचार केन्द्र सिद्घार्थनगरको प्राविधिक सहयोगमा भएको कार्यक्रममा ७० युनिट रगत संकलन भएको कार्यक्रम संयोजक तथा सहसचिव अर्जुन पोखरेलले बताए ।

यसैबिच लुम्बिनी केबलकार प्रालि र होटल तथा रेष्टुरेन्ट ब्यवसायी संघ रुपन्देहीबिच ब्यावसायिक साझेदारी सम्झौता भएको छ । लुम्बिनी केबलकार प्रालिका संचालक समितिका सदस्य तेजप्रसाद सुनार र संघका अध्यक्ष लेखनाथ भण्डारीले सम्झौता पत्रमा हस्ताक्षर गरेका छन् । होटल ब्यवसायी संघका सदस्यहरुलाई केबलकारको टिकटमा २० प्रतिशत छुट तथा टिकट बिक्रीमा ब्यवसायीहरुलाई १० प्रतिशत कमिशन समेत उपलब्ध हुने गरी सम्झौता भएको हो ।