© २०२३
रोल्पा, १० असार । रोल्पा नगरपालिकाले आगामी आर्थिक वर्ष २०८१/०८२ लाई सामुदायिक विद्यालय सुधार अभियान वर्षको रूपमा मनाउने भएको छ । रोल्पा नगरपालिकाको १५ औं नगरसभाले आगामी वर्षलाई सामुदायिक विद्यालय सुधार वर्षको रूपमा अघि सारेको हो ।
यो कार्यमा संघीय सरकारको सामुदायिक विद्यालय सुधार दशक नीति, कार्यक्रम, कार्ययोजना तथा प्रदेश सरकारका शैक्षिक सुधारका कार्यक्रमसंग समन्वय तथा सहकार्य गरिने नगर सभाले पारित गरेको नीति तथा कार्यक्रममा उल्लेख गरिएको छ ।
जसका लागी उसले बालविकास केन्द्रको बसाइँ व्यवस्थापन, सिकाई उपलव्धी कम भएका विषयको अतिरिक्त समयमा शिक्षण सहजीकरण, विषयगत शिक्षकहरूको क्षमता विकास, विषयगत शिक्षकहरूको वैठक अन्तर विद्यालय सिकाई आदान प्रदान जस्ता कृयाकलाप समावेश गरेको छ । नगरपालिकाले विद्यालय सुधार वर्षका लागि माध्यमिक तहका विद्यार्थीहरूका लागी विज्ञ शिक्षक, प्रधानाध्यापकहरूवाट करियर काउन्सिलिङ तथा व्रिजकोर्स संचालन, विद्यालय सुधारयोजना निर्माण सम्वन्धि विद्यालय व्यवस्थापन समितिका अध्यक्ष र प्रधानाध्यापकलाई क्षमता विकास तालिमको संचालन गर्ने जनाएको छ ।
नगरपालिकाले वडा शिक्षा योजना निर्माण र कार्यान्वयनका लागि वडा शिक्षा समितिका अध्यक्ष र सचिवलाई अभिमुखिकरण, दोश्रो नगर शिक्षा योजना तयारी, पढ्दै कमाउदै, कमाउदै पढ्दै कार्यक्रम संचालन गर्ने भएको छ । सामुदायिक विद्यालय सुधार वर्षको रूपमा नगरपालिकाले समसामयिक शैक्षिक गतिविधिको प्रस्तुतीकरण तथा अर्धवार्षिक समीक्षा, दश वटै वडाका शैक्षिक सिकाई उपलव्धी कम भएका विद्यालयको वस्तीहरूमा अभिभावक शिक्षा कार्यक्रम र स्थानीय भाषामा स्थानीय पाठ्यक्रम छपाई लगायतका कार्यक्रम संचालन हुने नगर प्रमुख सुरेन्द्र थापा घर्तीले जानकारी दिए ।
बालविकास केन्द्रका कक्षाहरूलाई सुविधा सम्पन्न वनाउने, सामुदायिक विद्यालयहरूलाई सूचकका आधारमा कार्यसम्पादन स्तर निर्धारण गरि प्रोत्साहन अनुदान दिने, सवै प्रकारका अपांगता भएका वालवालिकाहरूको लागी सिकाइ केन्द्र स्थापना गरि सवैको लागी शिक्षामा सघाउ पु¥याउने, नगर उपप्रमुख क्षमता विकास केन्द्र स्थापना गरि सीपमुलक तथा व्यवसायिक तालिम संचालन गर्ने नीति तथा कार्यक्रम अघि सारेको छ । नगरपालिकाले नगर प्रमुख छात्रवृत्ती कोषलाई व्यवस्थीत परिचालन गरि प्राविधिक छात्रवृत्ती अन्तरगत नगरका विद्यार्थीहरूलाई छात्रवृत्तीको दायरा वढाउने, एमविविएस तथा एमडि अध्ययनका लागी २ जनालाई छात्रवृत्ती उपलव्ध गराउने जस्ता कार्यक्रम अघि सारेको छ ।
नगरपालिकाले विद्यालयमा जंक फुडलाई प्रतिवन्ध लगाउने, माडीचौरमा रहेको कृषि क्याम्पसलाई देशकै दोश्रो ठूलो क्याम्पसको रूपमा विकास गर्न संघीय सरकार मार्फत भारतिय दुतावास संग वजेट माग गर्ने कार्यक्रम अघि सारेको छ । नगरका विभिन्न विद्यालय तथा शिक्षण संस्थाहरूवाट प्लस टु, डिप्लोमा र स्नातक पुरा गरेकाक विद्यार्थीहरूलाई नगरपालिका र वडा कार्यालयहरूमा ईन्टरर्नसीपको व्यवस्था गर्ने, हरेक शुक्रवारलाई सिर्जनशील वारको रूपमा अघि वढाउने । जसका लागी नगर भित्रका सामुदायिक र संस्थागत विद्यालयहरूमा हरेक शुक्रवार पाठ्यपुस्तक रहित सृजनात्मक कक्षा संचालन गर्ने, उक्त दिन कला, योगा, साहित्य, संगित खेलकुद लगायतका सृजनात्मक तथा ईमान्दारिता, अनुशासन, सदाचारिता सम्वन्धि व्यवहारिक शिक्षा प्रदान गर्न प्रात्साहन गर्ने भएको छ । नगरपालिका भित्रका विद्यालयहरूमा डिजिटल लर्निङ, इ लर्निङको अवधारणा प्रविधिको विकास गर्ने वताइएको छ । सवै सामुदायिक विद्यालयहरूमा सूचना अधिकारीको व्यवस्था गर्ने, अभिभावक विहिन वालवालिकाहरूको अभिभावकत्व ग्रहण गर्ने कुरा नीति तथा कार्यक्रमा समावेश गरिएको छ ।
जसका लागी नगरपालिकाले ३ करोड ३२ लाख वजेट विनियोजन गरेको छ । विनियोजित वजेट मध्ये ६० लाख ५४ हजार विभिन्न कार्यक्रम संचालनमा खर्च हुनेछ भने नगर शिक्षा सहयोग अनुदानमा १ करोड नौ लाख ७ हजार खर्च प्रस्ताव गरिएको छ । यसैगरि वालविकास शिक्षक, विद्यालय सहयोगी, विद्यालय कर्मचारी, सामुदायिक सिकाई केन्द्र परिचालिकाहरूलाई संघीय पारिश्रमिकमा नगरवाट थप अनुदानका लागी १ करोड १२ लाख ७१ हजार खर्च प्रस्ताव गरिएको छ ।