खोज

काठमाडौं,९ असार । कोशी प्रदेश सरकार विवादमा आज आइतबार सर्वोच्चले आदेश सुनाउने तयारी गरेको छ।

न्यायाधीशहरू कुमार रेग्मी, नहकुल सुवेदी, अव्दुल अजीज मुसलमानको इजलासमा गत जेठ ३१ गतेदेखि सुरु भएको सुनुवाइ आज पनि जारी छ।

यसअघि हेर्दाहेर्दैमा राखिएको रिटको आज अन्तिम आदेश हुनसक्ने अदालत स्रोतले जनाएको छ।

आफूलाई अपदस्थ गरी एमालेका हिक्मत कार्कीलाई मुख्यमन्त्री नियुक्त गरेको भन्दै कांग्रेसका केदार कार्कीले सर्वोच्च अदालतमा रिट दायर गरेका थिए।

उनले रिटमा आफ्नो पद निरन्तर कायम गराउन आदेश हुनुपर्ने माग गरेका छन्।

रिट निवेदनमा भनिएको छ, ‘संविधान बमोजिम पदमुक्त हुने कुनै पनि व्यवस्था मेरो हकमा लागु हुने अवस्था नरहेको कारणबाट मुख्यमन्त्रीको रुपमा मेरो नियुक्ती निरन्तर रहेको भनी सोही अनुरुपको कार्य गर्नु गराउनु भनि बिपक्षीको नाममा परमादेशको आदेश जारी गरी पाऊँ।’

केदारले हिक्मत कुमार कार्कीको नियुक्ति बदर गरी उनलाई कुनै पनि काम कारवाही गर्न रोक लगाउन समेत माग गरेका छन्। यसअघि गण्डकीमा एमालेका मुख्यमन्त्री खगराज अधिकारीलाई अदालतले अपदस्त गराई कांग्रेसका सुरेन्द्र राज पाण्डेलाइृ नियुक्त गर्न आदेश दिएको थियो ।