खोज

बुटवल,७ असार ।   नेकपा एमालेका पोलिटब्युरो सदस्य एवं लुम्बिनीका पुर्व मुख्यमन्त्री लिला गिरीसहितका एमाले रुपन्देहीको नेतृत्वले बुटवलको मिलनचोकस्थित डेल्टा मार्टमा भएको आगलागी क्षतिको अवलोकन गरेका छन् ।

बुटवलको मिलनचोकमा रहेको डेल्टा कम्प्लेक्समा बिहीबार सांझदेखि लागेको आगलागीबाट कम्प्लेक्सको तीनवटा तलामा रहेका पसलका सबै सामान जलेर नष्ट भएका थिए ।

आगलागी अवलोकनपछि नेता गिरीले आर्थिक मन्दीको बेलामा आगलागीले ठूलो क्षति पु¥याउंदा व्यवसायीलाई ठूलो मार परेको बताए । यो घटनाले आफूहरुलाई दुख लागेको बताए । त्यस अवसरमा डेल्टा कम्प्लेक्सका सञ्चालक प्रकाश भुसालले तेस्रो तलामा रहेको वैठक कोठाबाट आगलागी भएको र डेढ घण्टासम्म अरु तलामा आगो नफैलिएको अवस्था रहेपनि आधुनिक प्रविधियुक्त दमकल अभावमा क्षतिबाट जोगाउन नसकिएको बताए ।

बुटवल उपमहानगर वा अन्य स्थानीय तहको आधुनिक प्रविधिको दमकल भएको भए पहिलो र दोस्रो तलाको सामानलाई आगलागीबाट जोगाउन सकिने महसुस भएको उनले बताए । भैरहवा विमानस्थलको दमकल आएको कारण आसपासका वस्ती जोगाउन सकिएको बताए ।

नेता गिरीसंग एमाले पोलिटब्युरो सदस्य दधिराम न्यौपाने, केन्द्रीय सदस्य एवं बुटवलकी उपप्रमुख सावित्रा अर्याल, जिल्ला अध्यक्ष यज्ञ गैरे, निवर्तमान अध्यक्ष तेजेन्द्र केसी, सचिव चित्रबहादुर कार्की, उपसचिव बाबुराम पन्थी , जिल्ला सदस्य यमराज पाण्डे लगायत नेताहरुले आगलागीका घटनाबाट जोगिन पुर्व तयारी र आधुनिक प्रविधिका दमकलको आवश्यकतामा जोड दिए ।

५ घण्टामा नियन्त्रणमा आएको आगलागीबाट करिब ५० करोडको क्षति भएको सञ्चालक प्रकाश भुसालले बताए । आगलागीबाट त्यहाँ रहेका सबै सामान जलेर नष्ट भएका छन । बिहीवार साँझ साढे ६ बजेबाट लागेको आगो शुक्रबार राति २ बजेतिर नियन्रणमा आएको थियो।

ईलाका प्रहरी कार्यालय बुटवलका अनुसार मोटर ग्यारेज, दुईवटा पेट्रोल पम्प र बाक्लो बस्तीको बीचमा रहेको डेल्टा कम्प्लेक्सबाट अन्यत्र आगो फैलिनबाट जोगिएपनि कम्प्लेक्स भने पुर्ण रुपमा ध्वस्त भएको छ।

झण्डै ३० हजार स्क्वायर फुट क्षेत्रफलमा बनेको कम्प्लेक्समा स्टेशनरी,खेलकुद, झण्डै दुई दर्जन बढी विद्यालयका तयारी पोसाक, काँचो र तयारी कपडा सहित नेपाली लुगा घर, जुत्ता बजार र खाध्यान्नका मार्ट संचालनमा थिए।

ईलाका प्रहरी कार्यालय बुटवलका प्रमुख डिएसपी विजयराज पण्डितका अनुसार कम्प्लेक्समा संचालित सम्पुर्ण पसल र सामानहरु झण्डै आठ घण्टा लागेको आगोले खरानी भएका छन्।

आगलागी पछि बुटवल उपमहानगरपालिका, तिलोत्तमा, सैनामैना, सिद्धार्थनगर, लुम्बिनी सांस्कृतिक नगरपालिका, नवलपरासीका बर्दघाट र परासी, कपिलवस्तुको वाणगंगा तथा नेपाल आयल निगम भलवारी र गौतमबुद्ध अन्तर्राष्ट्रिय विमानस्थलबाट समेत गरि १० वटा दमकल आगो नियन्त्रणमा खटिएका थिए।
फलाम र प्यानलबोर्डबाट बनेको चारतल्ले भवन पूर्ण रुपमा जलेर नष्ट भएको छ। चारैतर्फ प्यानलबोर्ड र शिशा जडान गरि निर्माण गरिएको कारण कम्प्लेक्सको आगो सबै तलामा फैलिएको थियो।

कम्प्लेक्सको माथिल्लो तलामा डेल्टा एजुकेशन मार्ट रहेको थियो भने अन्य तिनवटा तलामा नेपाली जुत्ता बजार, नेपाली लुगा घर र खाद्यान्न पसल थिए। बुटवलका ठुला व्यवासायी र शिक्षण पेशाका अगुवाहरुले ५ बर्ष पहिले संचालन गरेको डेल्टा एजुकेशन मार्टमा पछिल्ला दुईबर्षदेखी नेपाली जुत्ता घर र नेपाली लुगा घरपनि संचालन गरिएको थियो।