खोज

बुटवल, ३२ जेठ ।

कफीका लागि गुल्मी प्रसिद्ध छ । अझ कफी उत्पादनका हिसाबले सिन्धुपाल्चोक जिल्ला एक नम्बरमा पर्छ । विश्वबजारमा कफीको माग राम्रो छ । कफीका धेरै परिकार बन्ने गर्छ । मेशिनबाट तैयार गरिने कफी सबैभन्दा धेरै उपभोग हुने गर्छ । वर्सेनि नेपाली कफी निर्यात हुने गरेको छ । रुपन्देहीका होटल तथा रेष्टुरेन्ट ब्यवसायीहरुको दक्षता अभिवृद्धि हुने गरी १६ दिने निःशुल्क वारिष्ठा तालिम दिइएको छ । ईन्स्योर परियोजना बुटवल रुपन्देही उद्योग संघको आर्थिक सहयोग तथा स्टेयरलिङ इन्टरनेशनल कलेज अफ हस्पिटालिटीको प्राविधिक सहयोगमा कामदारहरुको लागि थप सीप तालिम कार्यक्रम अन्तर्गत वारिष्ठा तालिम बिहीबारदेखि बुटवलमा शुरु भएको हो ।

कार्यक्रमको उद्घाटन गर्दै रुपन्देही उद्योग संघका द्वितीय उपाध्यक्ष हरि बहादुर खत्रीले सीप सिकेर मालिक बन्न सुझाव दिए । केवल सर्टिफिकेट जम्मा गर्ने रुपमा नभई सिकेका ज्ञानका कुरा ब्यवहारमा लागु गर्न सके सफल भईने उनले दाबी गरे । कफीका धेरै परिकार र सबै समय पिउन मिल्ने हुँदा पनि पारखी बढेको भन्दै तालिमबाट दक्ष जनशक्ति तयार गर्न सहयोग मिल्ने उनले बताए । कफीका परिकार, पस्कने तरिकाका बारेमा तालिममा ज्ञान दिइने उनले बताए ।

कार्यक्रममा रुपन्देही होटल तथा रेष्टुरेन्ट ब्यवसायी संघका अध्यक्ष लेखनाथ भण्डारीले कफी घरका रुपमा चिनिने गुल्मी जिल्ला र सबैभन्दा धेरै कफी उत्पादन हुने सिन्धुपाल्चोक जिल्ला भएको भन्दै यसलाई आयआर्जनसंग जोड्ने गरी स्वदेशमा नै अभियान थाल्नुपर्ने बताए ।

‘कफीको राम्रो बजार रहेको छ’—उनले भने । विश्वमा तरल पदार्थ पानी पछि सबैभन्दा बढी कफी पिउने गरिएको तथ्यांकमा रहेको भन्दै उनले पछिल्लो समय कफीको माग र परिकार बढेको बताए । यस्तोमा यी नयाँ बजारका परिकार बुझ्ने र बुझाउने रुपमा तालिम महत्वपूर्ण छ । बुटवललाई रात्रिकालीन बजारमार्फत आर्थिक चलायमान बनाउने गरी अभियान थालेको र यसका लागि स्थानीय सरकार, प्रशासन, प्रहरीको सहयोग भएको भन्दै आवश्यक जनशक्ति उत्पादनमा आफुहरु लागेको उनले बताए । ब्यवसाय धेरै कठिन मोडमा रहेको बेला स्थानीय सरकारबाट करको दायराभन्दा दरमा जोड दिने गरी ल्याएको योजनाप्रति ब्यावसायिक संघसंगठनहरुको बिरोध रहेको भन्दै आफुहरु एक ढिक्का भएर आवाज उठाउने बताए । ब्यवसायीहरुबाट होडिङ बोर्डको शुल्क उठाउने विषय गम्भीर कुरा भएको उनले बताए ।

कार्यक्रममा संघका वरिष्ठ उपाध्यक्ष माधव कुमार खनालले युवाहरु अब तालिमपछि विदेश जाने सोच वदल्न जरुरी रहेको बताए । स्वदेशमा नै धेरै अवसरहरु रहेको हुँदा सिकेको सिपलाई प्रयोगमा ल्याउन उनले सुझाव दिए । तालिम स्वरोजगार र उद्यमी बन्ने अवसर भएको भन्दै यसलाई भरपुर उपयोग गर्न सुझाव दिए ।

कार्यक्रममा संघका पर्यटन उपाध्यक्ष रोमाकान्त पाण्डे, द्वितीय उपाध्यक्ष प्रेम भट्टराई, महासचिव अर्जुन थापा, कार्यालय प्रमुख टिकाराम ज्ञवाली, प्रशिक्षक धिरन राकस मगर, रुपन्देही उद्योग संघका सीप विकास ईकाईका संयोजक खिमानन्द रिजालले संघसंस्थामा कार्यरत कामदार लक्षित सीप अभिवृद्धि गर्ने गरी तालिम चलाउँदै आएको बताए ।

कार्यक्रममा संघका तालिम संयोजक माधव ढकालले सिकाई कहिलै अन्त्य नहुने भन्दै पछिल्लो समय संघको तालिममा आकर्षण बढेको बताए । तालिममा २५ जना सहभागी रहेका छन् ।