खोज

सल्यान, १८ जेठ । युवा नेतृत्व विकास र निर्णय क्षमता निर्माणको लागि सल्यानको छत्रेश्वरी गाउँपालिकामा नमूना गाउँसभा सम्पन्न भएको छ । छत्रेश्वरी गाउँपालिकाको सहयोग, युवाक्लबको आयोजना तथा दलित विकास समाज सल्यान, आइएम स्वीड्स डेभलपमेन्ट पार्टनर लगायतका निकायको समन्वयमा नमुना युवा गाउँसभा संचालन गरिएको हो ।

छत्रेश्वरी गाउँपालिकामा मंगलबारदेखि बिहीबारसम्म चलेको अभ्यासमा प्रत्येक वडाबाट वडा क्लवबाट प्रतिनिधित्व हुनेगरी गरी ३÷३ जनाका दरले ७ वटा वडाबाट जम्मा २१ जना थिए । उनीहरू युवा क्लव गठन तथा नमुना युवा संसद अभ्यास कार्यविधि बमोजिम १६–२४ वर्ष उमेर समूहबाट प्रतिनिधित्व गरेका थिए । कार्यक्रममा युवाहरूले युवा, जीवन र मार्गदर्शन, युवा संसदको अभ्यास र अवधारणा, लोकतन्त्र, लोकतन्त्रमा युवाको भूमिका, लोकतन्त्रमा जनताको शासन, सूचनाको हक, यसको प्रयोगको संवैधानिक एवं कानुनी व्यवस्था, राज्यका अंग र तीनका भूमिका, योजना निर्माणका चरण, योजना तर्जुमाका आधार, लगायतका विविध पक्षहरू बारे जानकारी लिएका थिए । उनीहरूलाई राष्ट्रिय युवा परिषदका प्रशिक्षक युवराज खड्काले प्रशिक्षण दिएका थिए ।

त्यसपछि युवाहरूले नेपालको संविधानले व्यवस्था गरेबमोजिमको स्थानीय सरकारको निर्वाचन, निर्वाचन ऐन बमोजिमको निर्वाचन प्रक्रियमा सहभागी नमुना जनप्रतिनिधिहरू नमुना मतदानमार्फत मताधिकारको उपयोग गरी छनोट गरेका थिए । नमुना मतदान मार्फत गाउँपालिका अध्यक्षमा जीवन बुढाथोकी र उपाध्यक्षमा सीता राना मगर चयन भएका थिए ।

स्थानीय सरकार सञ्चालन ऐन २०७४ बमोजिम सरकार सञ्चालको अभ्यास गाउँ सभामार्फत युवाहरूले गरेका थिए । जसमा आर्थिक वर्ष २०८१/०८२ को नमुना नीति तथा कार्यक्रम, नमुना बजेट, आर्थिक तथा विनियोजन विधेयक तथा स्थानीय युवा परिषद गठन सम्बन्धी विधेयक क्रमश सभा समक्ष प्रस्तुत गरी त्यस उपर छलफल र जवाफको प्रक्रिया पश्चात निर्णार्थ प्रस्तुत गरिएको थियो । छलफलको क्रममा कसैले राम्रो नीति तथा कार्यक्रम ल्याएकोमा सभाध्यक्षलाई धन्यवाद दिएका थिए भने कुनै गाउँ सभा सदस्यले गलत मनासायबाट आएको भनी आलोचना तथा परिमार्जन गर्न सभा मार्फत सभाध्यक्षको ध्यानाकर्षण गराएका थिए । त्यसपश्चात आवश्यक संशोधन सहित सर्वसम्मत पारित गरिएको थियो ।
नमुना अभ्यासपछि सहभागीहरूलाई प्रमाणपत्र वितरण गरिएको थियो । सो अवसरमा बोल्दै छत्रेश्वरी गाउँपालिका अध्यक्ष ओज बहादुर बुढाथोकीले नमुना गाउँसभाको अभ्यासले युवाहरूमा राजनीतिक अभ्याससँगै नेतृत्व क्षमताको विकास हुने भन्दै देश विकासको मुल प्रवाहमा युवाहरूको भूमिका र उनिहरूलाई कृयाशिल र जिम्मेवार बनाउन यसप्रकारका कार्यक्रमले सकारात्मक भूमिका खेल्ने धारणा व्यक्त गरेका थिए । प्रमुख प्रशासकीय अधिकृत गुरु प्रसाद योगीले नमुना गाउँसभाले युवाहरूलाई सामुदायिक विकासमा देखिएका समस्या समाधानका लागि नेतृत्व गर्ने सीप प्रदान गर्ने अपेक्षा व्यक्त गर्दै गाउँपालिकाले युवाहरूलाई प्राथमिकतामा राखेर काम गरिरहेको बताएका थिए । सो अवसरमा नमुना गाउँसभाका अध्यक्ष जीवन बुढाथोकी र उपाध्यक्षमा सीता राना मगरले आफ्नो अनुभव सुनाएका थिए ।

युवालाई राजनीतिमा जिम्मेवार बनाउँदै समाज र राष्ट्रप्रति उत्तरदायी बनाउने, युवालाई देशप्रति जिम्मेवार बनाउने, युवाहरूमा असल चरित्र निर्माण गर्ने, समग्रमा युवाहरूमा नेतृत्वदायी क्षमताको विकास गराउने, भोलिको दिनमा जनप्रतिनिधि हुँदा काम गर्ने शैलि, नीति निर्माण तथा कानुनहरूको जानकारी गराउने उद्देश्यले कार्यक्रमको आयोजना गरिएको युवालयका कार्यक्रम संयोजक शर्मिला थापाले जनाइन ।