खोज

बुटवल ।

बुटवल हस्पिटल प्रालिले नयां भवनबाट सेवा शुरु गरेको छ । बुटवल उपमहानगरपालिका वडा न ६ चांदवारी चोकको उत्तरपट्टि आफ्नै सुविधा सम्पन्न भवनवाट सेवा शुरु गरेको हो ।

विगत २४वर्षदेखि बुटवलको अस्पताल लाईनबाट स्वास्थ्य सेवा प्रदान गर्दै आएको हस्पिटलले अत्याधुनिक उपकरणहरु समेत थप गरी सेवा विस्तार गरेको हो ।

सरकारले स्वास्थ्य संस्थाहरुलाई पूर्वाधार निर्माणका लागि दिएको समयभित्रै बुटवल हस्पिटलले भवन निर्माण गरी सेवा शुरु गरेको हो ।

स्वास्थ्य क्षेत्रमा आएका आधुनिक उपकरणहरु समेत जडान गरी बुटवल हस्पिटलले एक पटकमै धेरै मोडुलर अप्रेशन थ्रेटरहरु संचालनमा ल्याएको छ । जसका कारण ठुला दुर्घटनाहरु भएको खण्डमा पनि बुटवलबाट विरामी रिफर गर्न नपर्ने अवस्था आएको अस्पतालको दावी छ ।

अहिले अस्पतालमा एक दर्जनभन्दा वढी बिशेषज्ञ चिकित्सकहरुले सेवा प्रदान गरिरहेका छन् । करिब २ सय स्वास्थ्यकर्मी तथा कर्मचारीहरु रहेका छन् । आइसियू, भेन्टिलेटर फिजियो सहितका सुविधा रहेको हस्पिटलको भौतिक संरचना देशकै ठुला अस्पतालहरुकै शैलीमा निर्माण भएको छ । ५० वेडको स्वीकृत पाएको हस्पिटलले एक सय वेड स्वीकृतीका लागि सम्वन्धित निकायमा आवेदन पेश गरेको अस्पतालका अध्यक्ष चुन्न प्रसाद शर्मा पौडेलले बताए । उनले भने – “बुटवल मेडिकल हब हो भन्ने प्रमाणित गर्नका लागि पनि हामीले उपकरण, दक्षजनशक्ति र भौतिक पुर्वाधारको समिश्रणमा जोड दिएका छौं, अशा छ अवका दिनमा यहांबाट विरामीहरु सेवा लिन काठमाडौं र भारतिय बजारहरुमा जान रोकिने छ ।”

पश्चिम नेपालकै उपचारका लागि केन्द्र मानिने बुटवलमा प्रविधि, भौतिक पूर्वाधार र दक्ष जनशक्तिको सन्तुलन मिले बिरामीका लागि धेरै सजिलो हुने अस्पतालका मेडिकल निर्देशक डा. कृष्ण खनालको भनाई छ । उपचारका नाममा धेरै ठुलो रकम बाहिरिने तथ्य रहेको भन्दै लुम्बिनी प्रदेशका पुर्व स्वास्थ्य मन्त्री विष्णु पन्थीले बुटवल हस्पिटल निजी क्षेत्रको भएर पनि बुटवलका लागि गौरव रहेको बताए ।

उनले तत्काल एक सय वेड संचालनको अनुमति प्रदेश सरकारले दिने भन्दै बुटवलमा बल्ल अस्पतालको जस्तो भवन निर्माण भएको बताए । दुई वटा लिफ्ट, प्रशस्तै पार्किङ भएकोले विरामीहरुका लागि निकै सहज भएको छ । बुटवलमा आईसीयू अभावमा दैनिक विरामीहरु रिफर गर्नु पर्ने अवस्था रहेकोले त्यसको पुर्ति अब बुटवल हस्पिटलले गर्ने अपेक्षा गरिएको छ ।