खोज

काठमाडौं,६ जेठ । सहकारी रकम अपचल छानबिन गर्न समिति बनाउन सत्तारुढ दल र प्रतिपक्षी दलबिच सहमती जुटेपनि छानबिन समितिको क्षेत्राधिकार विषयमा सहमति जुट्न सकेको छैन ।

समितिको टीओआर कार्यादेश बनाउन बनेको कार्यदलमा सहमति जुट्न नसक्दा प्रतिनिधिसभा बैठक आज पनि अन्योलमा पर्ने देखिएको छ।

आइतबार बिहानैबाट कार्यदलका सदस्यहरू छलफलमा जुटेका थिए। यद्यपि उनीहरूबीच बिहान ११ बजेसम्म पनि सहमति जुटन सकेको छैन।   कानुन मन्त्रालयमा बसेको बैठकमा सहमति जुट्न नसकेपछि नेपाली कांग्रेसका प्रमुख सचेतक रमेश लेखक पनि छलफलमा सहभागी हुन पुगेका छन्।

चार सदस्यीय कार्यदलको बैठक आइतबार बिहानदेखि जारी छ। तर क्षेत्राधिकारका विषयमा काङ्ग्रेससंग कुरा मिल्न नसकेपछि अहिले काङ्ग्रेस प्रमुख सचेतक रमेश लेखक नयाँ बानेश्वरबाट सिंहदरबार पुगेका छन्।

संसद सचिवालयका एक अधिकारीले बताए अनुसार, कार्यदलमा कुरा नमिली संसद चल्ने सम्भावना कम छ।
यसअघि शनिबार बेलुकी प्रमुख प्रतिपक्षी दलसँग सत्तारुढ दलका नेताबीच समिति बनाउने सहमति भएको थियो। कांग्रेसले रवि लामिछानेका नाम र उनी संलग्न गोर्खा मिडिया नेटवर्कको नाम उल्लेख गर्नुपर्ने अडान राखेको छ ।