खोज

काठमाडौं,२५ बैशाख । निर्वाचन आयोगले जनता समाजवादी पार्टी जसपा नेपालबाट निर्वाचित प्रदेश सभा सदस्य र स्थानीय तहका जनप्रतिनिधिको सनाखत प्रक्रिया थालेको छ।

आयोगले मंगलवार सूचना जारी गरी जसपा नेपाल टुक्रिएर गठन भएको नयाँ पार्टी जनता समाजवादी पार्टी जसपाको गठन प्रक्रियाका लागि सांसद र जनप्रतिनिधिको सनाखत गर्न शुरु गरेको हो।

जनप्रतिनिधिले जेठ १३ गतेसम्म प्रदेश सभा सदस्यले प्रदेश निर्वाचन कार्यालयमा प्रदेश निर्वाचन अधिकारी समक्ष र स्थानीय तहका सदस्यले जिल्ला निर्वाचन कार्यालयमा जिल्ला निर्वाचन अधिकारी समक्ष आफू निर्वाचित भएको सक्कल प्रमाणपत्र साथमा लिई सनाखतका लागि उपस्थित हुन पर्नेछ।

आयोगले राजनीतिक दल सम्बन्धी ऐन, २०७३ र राजनीतिक दल सम्बन्धी नियमावली, २०७४ को नियम ५ बमोजिम आयोगको मिति २०८१।०१।२४ गते निर्णय गरी सनाखतको काम अघि बढाएको हो। प्रतिनिधि सभामा १२ सांसद मध्ये ६ जना अशोक राई नेतृत्वमा गठन हुने जसपातिर लागेर हस्ताक्षर गरेका छन् । तर प्रदेश र स्थानीय तहका जनप्रतिनिधि मध्ये को कता भन्ने खुलेको छैन ।

प्रदेशसभामा जसपा नेपालका २० जना निर्वाचित छन् । यस्तै स्थानीय तहमध्ये २१ जना गाउँपालिका अध्यक्ष, १२ जना उपप्रमुख, १९ जना गाउँपालिका उपाध्यक्ष, २९५ वडा अध्यक्ष, २९९ जना महिला सदस्य, २९६ जना दलित महिला सदस्य र ५९८ जना खुला सदस्य निर्वाचित भएका छन् ।