खोज

बुटवल, १९ वैशाख । स्काउट आधारभूत तालिम ४१३ औँ पिटिसी तालिम बुधबार समापन भएको छ । स्थानीय स्काउट समिति बुटवलको आयोजनामा ६ दिने तालिमको बुटवल उपमहानगरपालिका उपप्रमुख तथा स्थानीय स्काउट प्रमुख सावित्रादेवी अर्यालले समापन गर्दै बालबालिकालाई जीवन उपयोगी शिक्षा दिने, सुयोग्य नैतिकवान र अनुशासित नागरिक तयार गर्ने स्काउटको उद्देश्य अनुसार महत्वपूर्ण काम सम्पन्न भएको बताईन । नगरभित्र रहेका विद्यालयमा अध्ययरत विद्यार्थीहरुलाई अध्ययनसंगै स्काउटमा आवद्ध गराई जीवन उपयोगी ब्यवहारिक शिक्षा दिन सफल भएको बताईन ।

कार्यक्रममा लुम्बिनी प्रदेश स्काउटका प्रमुख आयुक्त दिनानाथ भट्टराई, नवीन औद्योगिक कदर बहादुर रीता माध्यमिक विद्यालयका प्रधानाध्यापक प्रेम बहादुर बस्नेत, रोटरी ईन्टरनेसनलका सहायक गभर्नर राजेन्द्र ढकाल, इडन बोर्डिङ स्कुलका अध्यक्ष एवं जनप्रतिनिधि नकुल शाही ठकुरी, नेपाल स्काउट राष्ट्रिय सहायक प्रशिक्षक सीता माया तनावसे, परिषद् सदस्य पुनाराम पाण्डेले सामाजिक उत्तरदायित्वसंगै अन्तरराष्ट्रिय सम्बन्ध बिस्तार गर्ने संस्थाका रुपमा स्काउट भएको बताए । तालिममा सहभागी सुनिता पन्थ र ब्युटी रसालीले एक हप्ते तालिममा आफुहरुले धेरै सिकाई सिक्न पाएको बताए ।

बुटवल उपमहानगरपालिका अन्तर्गतका १२ वटा सामुदायिक र ६ वटा संस्थागत गरि १८ वटा विद्यालयका महिला शिक्षकहरुलाई पाँच क्षेत्र शारीरिक, बौद्विक, सामाजिक, आध्यात्मिक र संवेगात्मक विकासमा सहयोग पुर्याउने र विद्यालयमा बालबालिकालाई जीवन उपयोगी शिक्षा दिने, सुयोग्य नैतिकवान र अनुशासित नागरिक तयार गर्ने स्काउटको उद्देश्य अनुसारको तालिम दिईएको स्थानीय स्काउट प्रमुख आयुक्त नवराज खरेलले बताए । नवीन औद्योगिक कदर बहादुर रीता मा.वि.मा ६ दिन ५ रातसम्म चलेको थियो ।