खोज

केही दिनअघि सार्वजनिक भएको स्वास्थ्य तथ्याँकले लिंग पहिचानको नाममा बालिकाहरूको भ्रूणमै हत्या हुने गरेको देखाएको छ । यो गंभीर चिन्ताको बिषय हो । भ्रुणभित्र पहिला छोरा छोरी पहिचान गर्ने र छोरी भए गर्भ तुहाउने काम मानवका लागि शोभनीय हुँदै होइन । यो क्रम बढ्दै गएको र यसले सामाजिक जीवनमा ठूलो खाडल उत्पन्न गर्ने देखिएको छ । पछिल्लो १० बर्षयता नेपालमा बालिकाहरूको संख्यामा कमी आउँदै गरेको कुरा राष्ट्रिय जनगणना २०७८ ले औंल्याएको छ । त्यसको प्रमुख कारण भनेको भ्रूण पहिचान गरि छोरी भए गर्भपतन गर्ने गंभीर अपराध देखिएको छ । समाजलाई नै लज्जित बनाउने यस्ता जघन्य अपराधका घटना बारम्बार दोहोरिँदै आउनु गम्भीर चिन्ताको विषय हो । केही क्रूर मानसिकता बोकेका नरपिशाचबाट हुने भ्रुण हत्याका घटनाले समाजलाई नै स्तव्ध बनाएको छ । छोरा भए राख्ने र छोरी भए गर्भपतन गराउने जुन पछिल्लो संस्कार विकास भैरहेको छ यसले मुलुकको जीवनचक्रमै असन्तुल सिर्जना गरिदिने देखिएको छ । सभ्य समाजमा यस्तो कुरा त परको बिषय हो । कुनैपनि प्रकारको यौनजन्य हिंसा सह्य हुँदैन । छोरी भ्रूणमा हुनु पनि अपराध भैरहेको छ । कस्तो बिडम्वना छोरीलाई गर्भमै मार्न थालिएको छ । आखिर छोरीमाथि किन यति निर्मम बनिरहेको छ नेपाली समाज ? निर्मला पन्तको बलात्कारपछि हत्या भएको पाँच बर्ष भयो । अपराधी अझै पत्ता लाग्न सकिरहेको छैन । गृहमन्त्री रबि लामिछानको पहिलो प्राथमिकतामा परेको यो काण्ड सेलाएको छ । गृहमन्त्रीको प्रतिवद्धता हावामै उडेको छ । छोरी भएकै कारण निर्मलाको बिभत्स हत्या भएको कुरामा दुई मत छैन । हरेकपटक परिवर्तन हुने सरकारले अपराधी पत्ता लगाउने दाबी त गर्छ तर अपराधी पक्राउ परेको कुनै संकेतसम्म देखिदैन । जुन समाजमा व्यक्तिको बाँच्न पाउने अधिकार सुरक्षित हुँदैन, त्यस मुलुकमा सरकार सामाजिक सुरक्षा र समृद्धिको कुरा गर्छ भने त्यसलाई लज्जास्पद मान्नुपर्छ । वास्तवमा अहिले बढ्दोरूपमा देखिएको भ्रूण हत्याको अपराधलाई निस्तेज गर्नेतर्फ प्रयास जरुरी छ । सामाजिक विकृति बढ्दै छ । न्यायको कुरा मर्दैछ ।

बालिकाहरू गर्भमै हुँदा मर्नुपर्ने कस्तो बिडम्वना छ १ छोरा पाउने नाममा लिंग पहिचान गर्दा छोरीहरूको हत्या भैरहेको छ । यो क्रम बढ्दो छ । यस्तो अपराधमा संलग्नमाथि हदैसम्मको कारवाही जरुरी छ । खासगरी पैसाको लोभमा स्वास्थ्यकर्मीहरू यो काममा बढी नै लागेका छन । स्वास्थ्यकर्मीहरूले भ्रुण पहिचान गर्न रोकिदिए भने यो समस्या समाधान हुन्छ तर पैसाको नाममा स्वास्थ्यकर्मीहरूबाट ठूलो अपराध भैरहेको छ । यहीकारण छोरी जन्मने क्रम छोराको तुलनामा आधा बढीले घटेको छ । निश्चितरूपमा यस प्रकारका कृयाकलापले समाजलाई नै असन्तुलित बनाउने छ । भूण हत्याको असर सृष्टिमै पर्ने अवस्था आउने छ । अहिले जसरी छोरा भए राख्ने र छोरी भए गर्भमै हत्या गरिदिने प्रवृत्ति देखिएको छ । यो गंभीर चिन्ताको विषयमा सम्बन्धित निकायको गंभीर ध्यानाकर्षण होस् । खासगरि नेपाल सरकारले भ्रुण पहिचान गर्ने काम तत्काल बन्द गराउन पहल गरोस् । यस प्रकारका कुकर्ममा जो संलग्न छ, उसमाथि कारवाही गरोस् । गर्भको भ्रुण पहिचान गर्ने काममात्र होइन भ्रुण पहिचानपछि गर्भपतन गराउने काम समेत बन्द गर्नेतर्फ सरकारको ध्यान जाओस् । यस्ता काममा संलग्नमाथि कडा कारवाहीको व्यवस्था नगरेसम्म यस प्रकारका कु–कृत्य कम नहुने भएकोले सम्बन्धित निकायको ध्यान जाओस् ।