खोज

बुटवल, ७ बैशाख । संजिवनी टोल विकास संस्थाले नियमित बार्षिक कार्यक्रम रक्तदान कार्यक्रम गरेको छ । बर्षको पहिलो महिनाको पहिलो शनिबार रक्तदान कार्यक्रम अभियान चलाएको संस्थाले यो बर्ष १० औ रक्तदान कार्यक्रम गरेको हो ।

कार्यक्रमको एक समारोहका बिच बुटवल उपमहानगरपालिका वडा नं ११ का वडा अध्यक्ष रामचन्द्र क्षेत्रीले रक्तदातालाई ब्लड ब्याग हस्तान्तरण गरि उद्घाटन गर्दै नगर विकासको अगुवाई टोल संस्थाहरुबाट हुने गरेको बताए । समुदायका मानिसहरुलाई जुटाएर सामाजिक कार्यमा अग्रसर गराउने र समुदायमा एकता ल्याउने काम टोल संस्थाबाट भएको उनले बताए ।

कार्यक्रममा नेपाल स्वयंसेवी रक्तदाता समाज रुपन्देहीका अध्यक्ष कृष्ण चौहान क्षेत्रीले रक्तदानको महत्वबारे प्रकाश पार्दै रगत अभावकै कारण मृत्यु हुने दर घटाउन रक्तदान अभियान जरुरी रहेको बताए । पछिल्लो वर्षहरुमा धेरै पालिकाहरु निशुल्क रगत अभियानमा जोडिनु सकारात्मक पाटो भएको भन्दै यसमा टोलटोल र समुदायको साथ सधै रहदै आएको उनले बताए ।

कार्यक्रममा टोल विकास संस्थाको अध्यक्ष हरि बहादुर गहतराजले टोलमा सरसफाई, खानेपानी तथा सामाजिक कार्यमा आफुहरु निरन्तर अभियान चलाउदै आएको बताए ।

कार्यक्रममा वडा सदस्य हेमा थामी, छिमेकी टोल विकास संस्थाका टेक बहादुर गुरुङ, नवदुर्गा मन्दिर समितिका अध्यक्ष अर्जुन कुवर, राष्टिय गहुबाली अनुसन्धान केन्द्रका अधिकृत हरिश्चन्द्र बिक, मिशन ग्रुप नेपाल बुटवलका हुम श्रेष्ठ, सामाजिक मेलमिलाप केन्द्रका सदस्य लक्ष्मण ज्ञवाली, संस्थापक अध्यक्ष सीता बिक, सल्लाहकार नरेन्द्र कुमार शर्मा, उपाध्यक्ष ईन्द्र बहादुर थापाले लागुऔषध र सरसफाईका कार्यक्रमलाई जोड दिनुपर्ने बताए ।
नेपाल रेडक्रस सोसाईटी, रक्तसंचार सेवा केन्द्रको प्राविधिक सहयोगमा भएको कार्यक्रममा ४१ जना पुरुष र ११ जना महिला गरि ५२ युनिट रगत संकलन भएको संस्थाका सचिव देविका मास्कीले बताईन ।