खोज

काठमाडौं,३ बैसाख ।   नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले सुदुरपश्चिममा गठबन्धन भत्किएपनि फरक नपर्ने बताएका छन् । सत्ता गठबन्धनलाई कमजोर बनाउने कदम चालेको भन्दै नेकपा एकीकृत समाजवादी पार्टीप्रति उनले आपत्ति जनाएका छन् ।

अध्यक्ष ओलीले सुदूरपश्चिम प्रदेशको मुख्यमन्त्री बनाउने बेलामा काँग्रेसनिकट भए मात्रै नागरिक उन्मुक्ति पार्टीलाई मुख्यमन्त्रीमा सहयोग गर्न सकिने भनी माधवकुमार नेपाल नेतृत्वको नेकपा एसले चालेको कदम अराजनीतिक प्रवृत्तिको भएको बताए ।

सोमबार पार्टी संसदीय दलको बैठकमा उनले काँग्रेस नजिक भएर सत्ता समिकरणलाई कमजोर बनाउने र यसलाई असफल बनाउन नेकपा एसले अराजनीतिक निर्णय लिएको आरोपसमेत लगाए। उनले सुदूरपश्चिम प्रदेशमा काँग्रेस केन्द्रित समिकरणबाट नागरिक उन्मुक्ति पार्टीलाई समर्थन गर्ने नेकपा एसको दक्षिणपन्थी अवसरवादी चरित्र धेरै नांगो ढंगबाट प्रकट भएको जिकिर पनि गरे।

काँग्रेस लगायतका विपक्षीहरुको आशा पलाउने तथा जनतामा आशंका, अन्योल र निराशा केही मात्रामा भएपनि पैदा हुनेगरी नेकपा एसले सो निर्णय लिएको ओलीको भनाइ थियो।
अध्यक्ष ओलीले नेकपा एमालेको ध्यान आगामी निर्वाचनमा बलियो राजनीतिक शक्तिको रुपमा स्थापित हुने रहेकाले त्यसलाई सफल बनाउन लागिपर्ने बताए।

सुदूरपश्चिममा सत्ता गठबन्धनविरुद्ध अर्को गठबन्धन बनेको छ। नागरिक उन्मुक्ति पार्टीसहित एकीकृत समाजवादी र नेपाली कांग्रेसको समर्थनमा नाउपाका लक्ष्मणकिशोर चौधरीलाई मुख्‍यमन्त्रीमा आइतबार दाबी पेस भएको छ।

यता, नाउपाकै कैशाल चौधरीलाई नेकपा एमाले र माओवादी केन्द्रले पनि मुख्‍यमन्त्रीमा समर्थन गर्दै दाबी पेस गरेका छन्। एउटै पार्टीबाट दुईजनाको दाबी परेपछि प्रदेश प्रमुख भने कानुनी परामर्शमा छन्।