खोज

सुनवल, ३ बैशाख । पश्चिम नवलपरासीको प्रतापपुर गाँउपालिकाले शैक्षिक संस्थामा शिक्षक अभावको समस्या समाधान गर्न शैक्षिक बेरोजगार सम्बोधन कार्यक्रम कार्यान्वयनमा ल्याएको छ । जसबाट माध्यमिक तह (कक्षा १२) उत्तिर्ण गरेर पनि बेरोजगार बसिरहेका युवायुवतीले विद्यालयमा अध्यापनको काम पाएका छन् भने शिक्षक अभावको समस्या पनि केहि हद सम्म समाधान भएको छ । अध्यक्ष शैक्षिक बेरोजगार सम्बोधन कार्यक्रम नाम दिईएको उक्त कार्यक्रम मार्फत युवायुवतीलाई रोजगारी पनि दिने र सामुदायिक विद्यालयमा देखिएको शिक्षक अभावको समस्या पनि समाधान गर्ने प्रयास थालिएको गाँउपालिका अध्यक्ष उमेशचन्द्र यादवले बताए । उक्त कार्यक्रम मार्फत गाँउपालिकाले चालु आर्थिक वर्षमा ४० लाख बजेट विनियोजन गरेको छ । सुरुमा कक्षा १२ वा स्नातक तहमा अध्ययनरत तथा स्नातक तह वा सो भन्दा माथीको योग्यता पुरा गरेर अन्य रोजगारीको अवसर नपाएकालाई समेट्ने गरी गाउँपालिकाले गत वर्ष कार्यविधि निर्माण गरेको थियो । सो कार्यविधिको आधारमा शैक्षिक बेरोजगार सुचिकृत गर्ने क्रममा १ सय ८८ जना सुचिकृत भएका थिए । ती मध्ये हाल २३ जनाले प्रा.वि. तहमा अध्यापन गराईरहेको अध्यक्ष यादवले बताए ।

गाउँपालिकाले रोजगारी सृजना गर्दे शैक्षिक जनशक्तिको अभाव पूर्ति गर्ने तथा शैक्षिक गुणस्तर सुधार गर्ने लक्ष्यका साथ यो कार्यक्रम संञ्चालनमा ल्याएको जनाएको छ । ‘युवायुवती पढेर पनि रोजगारी नपाउने अवस्था छ भने अर्कोतर्फ विद्यालयमा शिक्षक अभावको समस्या छ, पालिका भित्रकै शैक्षिक जनशक्तिलाई उपयोग गरेर समाधान खोज्नुपर्छ भन्ने उद्देश्यले बेरोजगार सम्बोधन कार्यक्रम ल्याईएको हो, अध्यक्ष यादवले भने ।’ पालिकाले विद्यालयमा हाजिर भई अध्यापन गराएको दिनको आधारमा मात्र सरकारले निर्धारण गरेको न्युनतम पारिश्रमिक उपलब्ध गराउने व्यवस्था गरेको छ । कुनै पनि व्यक्ति एक पटक छनौट भएपछि उक्त अध्यापन अनुमती एक आर्थिक वर्ष मात्र कायम रहने र गाँउसभाबाट बजेटको व्यवस्था भएमा पुन निरन्तरता पाउने कार्यविधिमा उल्लेख छ ।

प्रतापपुरमा २३ ओटा सामुदायिक विद्यालयमा २ सय ३५ शिक्षकले अध्यापन गराउदै आएका छन् । अझै पनि ५० जना शिक्षक अपुग रहेको गाउँपालिकाले जनाएको छ । गाँउपालिक भित्र रहेको विद्यालयमा शिक्षक र कक्षाकोठाको अभाव भएकाले समस्या हुँदै आएको छ । उक्त समस्या समाधानका लागि माथिल्ला दुई तहका सरकार संगै स्थानीय तह मार्फत काम भईरहेको अध्यक्ष यादवले बताए ।