खोज

 बुटवल, २५ चैत ।   नेपाल वन प्राविधिक संघको अध्यक्षमा राकेश कर्ण निर्वाचित भएका छन् । कर्ण प्रजातान्त्रिक वन प्राविधिक संघ,नेपाल राष्ट्रिय वन प्राविधिक सञ्जाल र मधेशका लागि वनको प्यानलका उम्मेदवार थिए ।

कर्णले १२६१ मत पाउंदा एमाले निकट प्रगतिशिल वन प्राविधिक संघका विजयराज पौडेलले ८६८ मत पाए । शनिबार राति सम्पन्न चुनावबाट प्रजातान्त्रिक प्यानलले एक उपाध्यक्ष र सदस्य वाहेक सबै पदमा जित हासिल गरेको हो ।

उपाध्यक्षमा प्रगतिशील प्यानलका सुजितकुमार झा १०८२ मत पाएर निर्वाचित हुंदा प्रतिस्पर्धी अमरदेव यादवले १०२६ मत पाएका निर्वाचन समिति संयोजक अरुण शर्मा पौडेलले जानकारी दिए ।

प्रगतिशिल वन प्राविधिक संघ र मधेशका लागि वनको असन्तुष्ट समूह मिलेर प्यानल बनाएका थिए । महिला महासचिवमा सुनिता उलक,महासचिवमा गोबिन्दप्रसाद दाहाल,महिला सचिवमा श्रृजना श्रेष्ठ,सचिवमा सुदिप छत्कुली र कोषाध्यक्षमा सुजितकुमार राउत निर्वाचित भएका छन् ।
कार्यसमिति सदस्यहरुमा सुवासचन्द्र झा,प्रकाशराज रेग्मीनिरजबाबु भट्ट,प्रशासन सापकोटा,पुष्पाकुमारी मिश्रा,श्रृजना श्रेष्ठ र राधिका शर्मा निर्वाचित भएका निर्वाचन समिति संयोजक अरुण शर्मा पौडेलले बताए । राधिका शर्मा प्रगतिशील प्यानलकी हुन् ।

नवनिर्वाचित अध्यक्ष कर्णले देशको ४५ प्रतिशत भन्दा बढी हिस्सा वन क्षेत्रले ओगटेको हुँदाहुँदै देशका काठदाउरा जंगलमै सडेको र वार्षिक अरबौं रुपैंयाको काठ आयात गर्नु लज्जास्पद भएकोले वन श्रोतहरुलाई उत्पादनमुखी विज्ञानसम्मत हिसाबले ‘भरि वन संम्वद्धन प्रणाली’ (सिल्भिकल्चर बेस्ड म्यानेजमेन्ट) मा आधारित दिगो वन व्यवस्थापन कार्यक्रम तत्काल लागु गर्न सरकारलाई दवाव दिइने बताए । यस्तै वन विज्ञहरुलाई योग्यताको प्रमाणपत्र वितरण गर्न नेपाल वन परिषद स्थापनालाई पनि प्राथमिकतामा राखेर काम गर्ने बताए ।

यस्तै सघियताको मर्म अनुरुप सबै तहहरुमा वन श्रोतको प्रभावकारी व्यवस्थापनको लागि पर्याप्त मात्रामा दरबन्दि श्रृजना गरी वन व्यवस्थापन गर्न सबै तहका सरकारहरुसँग पैरवी गरिने र ७५३ वटै स्थानीय तहहरुमा वन प्राविधिकहरुको दरबन्दी श्रृजना गर्नको लागि दवाव दिइने बताए ।
प्रजातान्त्रिक वन प्राविधिक संघ लुम्बिनीका महासचिव केशव खड्काले आफ्नो प्यानलले पाएको मत संख्या बराबर बृक्षारोपण गर्ने र सक्रिय वन व्यवस्थापन भएका क्षेत्रमा माउ रुखहरुको कलरिङ गर्ने प्रतिवद्धता पूरा गर्ने बताए । देशभर ३ हजार बढी वन प्राविधिक रहेका खड्काले बताए ।