खोज

बुटवल,१९ चैत । कर्णाली प्रदेश सरकारको नेतृत्व नेकपा एमालेले लिने सहमति भएको छ ।

सोमबार काठमाडौंमा बसेको एमाले–माओवादीसहित सत्ता गठबन्धनको बैठकले कर्णाली प्रदेश सरकारको नेतृत्व एमालेले लिने सहमति गरेको हो । माओवादी केन्द्रका कर्णाली इन्चार्ज कालीबहादुर मल्लका अनुसार प्रधानमन्त्री पुष्पकमल दाहाल प्रचण्डले कर्णालीको नेतृत्व एमालेले लिने सहमति भएको जानकारी आफूलाई गराएको बताए ।
मुख्यमन्त्री राजकुमार शर्माले मंगलबार विश्वासको मत लिने तयारी गरेका थिए । माओवादी उपमहासचिव जनार्दन शर्माले कर्णालीमा माओवादीकै मुख्यमन्त्रीको निरन्तरता हुनुपर्ने भन्दै पार्टी अध्यक्ष प्रचण्डलाई दबाब दिइरहेका थिए । यो सहमति अनुसार एमालेले मुख्यमन्त्री पाए एमाले प्रदेश संसदीय दलका नेता यामलाल कँडेल मुख्यमन्त्री बन्नेछन् । ४० सदस्यीय कर्णाली प्रदेश सभामा सरकार बनाउन २१ सांसदको समर्थन आवश्यक पर्छ । प्रदेश सभामा माओवादीका १३, एमालेका १० र एकीकृत सामाजवादीका १ सांसद रहेका छन् । त्यस्तै कांग्रेसका १५ र राप्रपाका १ सांसद छन् ।
कर्णालीमा एमालेले मुख्यमन्त्री पाएसंगै लुम्बिनीको मुख्यमन्त्री एमालेले गुमाउने डर भएको र माओवादी केन्द्रले पाउने सम्भावना बढेको राजनीतिक वृत्तमा चर्चा शुरु भएको छ । लुम्बिनीमा माओवादी केन्द्र भन्दा एमालेका सांसद संख्या तेब्बर बढी छ । तर पार्टीकै शीर्ष नेतृत्वले माओवादीलाई सुम्पिने गरी कर्णालीमा नेतृत्व लिएको एकथरि नेताहरुले टिप्पणी गरेका छन् ।