खोज

बुटवल, १८ चैत । ‘स्वस्थ रगत सबैका लागि’ भन्ने उद्देश्यका साथ शंकरनगर सामुदायिक वन उपभोक्ता समूह तिलोत्तमा १–४ अन्तर्गत हरियाली वन संरक्षण महिला उपसमुह र नेपाल स्वयंसेवी रक्तदाता समाज तिलोत्तमा शाखाको संयुक्त आयोजना तथा जागृति युवा क्लबको सहकार्यमा रक्तदान कार्यक्रम गरिएको छ । तिलोत्तमा २, तपाहामा शनिबार भएको कार्यक्रमको शंकरनगर सामुदायिक वन तिलोत्तमा १–४ का अध्यक्ष रविन्द्र वस्नेतले रक्तदातालाई ब्लड व्याग हस्तान्तरण गरेर कार्यक्रमको उदघाटन गर्दै हरेक स्वस्थ युवा नियमित रक्तदान गर्नुपर्नेमा जोड दिए ।

कार्यक्रममा तिलोत्तमा वडा नं. २ का वडाध्यक्ष डिलबहादुर भट्टराई, कार्यपालिका सदस्य सावित्रा आचार्य, जनप्रतिनिधिहरु डोलबहादुर थापा, खेमराज पाठक, नेपाल स्वयंसेवी रक्तदाता समाज रुपन्देहीका अध्यक्ष कृष्ण चौहान क्षेत्री, तिलोत्तमा शाखाका अध्यक्ष गोविन्द भुसाल, सल्लाहकार टेकबहादुर थापा, अर्जुनप्रसाद पौडेल, वनका उपाध्यक्ष कमला ज्ञवाली, कोषाध्यक्ष भुवन आचार्य, जागृति युवा क्लबका अध्यक्ष विदुर के.सी., मिलिजुली आमा समुहका अध्यक्ष दिना चन्द, जागृति टोल विकास संस्थाका का.वा. अध्यक्ष हिमलाल वश्याल, महिला उपसमुहका मेनुका थापा, निरा वस्यालले रक्तदान जस्तो पवित्र दान जीवनमा अरु केही हुन नसक्ने बताए ।

रक्त सञ्चार सेवा इकाई भैरहवाको प्राविधिक सहयोगमा भएको कार्यक्रममा पहिलोपटक रक्तदाता महिलाको उल्लेख्य सहभागिता रहेको उपसमुहकी अध्यक्ष गीता वश्यालले बताईन । महिला उपसमुह आफ्नो वार्षिक कार्यतालिकाअनुसार रक्तदान कार्यक्रम आयोजना गर्दै आएको भन्दै उनले शनिबार ५० युनिट रगत संकलन भएको बताईन । तिलोत्तमा शाखाले यससँगै ३६ औ नियमित श्रृङखला सम्पन्न गरेको शाखाका उपाध्यक्ष अञ्जु पौडेलले बताएकी छन् ।