खोज

बुटवल, ७ चैत । रम्भादेवी कलेज अफ मेडिकल साईन्स बुटवलका बिद्यार्थीहरुलाई एक दिने मानसिक स्वास्थ्य सचेतना दिईएको छ । रम्भादेवि ग्रुप अफ अर्गानाईजेसनबाट सञ्चालित कलेजको स्टुडेन्ट अफ हेल्थ एसिस्टेन्स, मेडिकल ल्याब्रोटरी, मेडिकल रेडियोलोजी र प्लस टु अध्ययरत विद्यार्थीहरुलाई लक्षित गरि एक दिने कार्यक्रम गरिएको हो ।

कार्यक्रममा ग्रुपका प्रबन्ध निर्देशक मनोज बस्नेतले युवा वर्गमा पछिल्लोसमय मानसिक स्वस्थ्य समस्या बढ्दो रुपमा रहेको भन्दै विद्यार्थीहरुमा यसबारे सचेतना दिने गरि एक दिने कार्यक्रम गरिएको बताए । विश्व स्वास्थ्य सङ्गठनका अनुसार नेपालमा कुल जनसङ्ख्याको ३.२ प्रतिशतमा डिप्रेसन रहेको तथ्याक सार्वजनिक भएको भन्दै उनले यसबाट मानसिक अपाङ्गताको भार ५.४ प्रतिशत देखिने समेत बताए । यसैगरि एन्जाइटी रोग ३.६ प्रतिशतमा रहेको तथा नेपालमा कुल नसर्ने रोगहरुको समस्या मध्ये १८ प्रतिशत मानसिक रोगले ओगटेको तथ्याकबाट प्रष्ट हुने उनले बताए । अपाङ्गता गराउने प्रमुख १० समस्याहरु मध्ये ४ वटा मानसिक स्वास्थ्य समस्या नै पर्दछ ।

तालिममा परामर्श मनोवैज्ञानिक कपिल शर्माले मानसिक स्वस्थ्यबारे विद्यार्थीहरुलाई जानकारी दिए । प्रारम्भिक अवस्थामा हुने लक्षण र यसबाट निदानबारे समेत उनले बताए । नेपालमा गरिएको एक अध्ययनबाट १३—१७ वर्षका किशोर किशोरीहरुमा ११.२ प्रतिशत, १८ वर्षमाथिका व्यक्तिहरुमा १३.२ प्रतिशतमा मानसिक स्वास्थ्य समस्या भेटिएको थियो । दुबै उमेर समुहमा डिप्रेशन, चिन्ताजन्य समस्या, आत्महत्या सम्बन्धि सोच बढी भेटिएको पाईएको छ । नेपालमा हरेक वर्ष आत्महत्याको दर १२ प्रतिशतले बढेको पछिल्लो तथ्याकले देखाउँदछ । यो समस्या महिला तथा किशोरी उमेरमा धेरै देखिएको छ ।

कार्यक्रममा मेडिकल कलेजका प्राचार्य मनोज काफलेले मानसिक स्वस्थ्यका बारेमा बेलैमा जानकारी दिदा विद्यार्थीहरुमा सकारात्मक सोच विकास हुने भन्दै यस्ता कार्यक्रमलाई आगामी दिनमा समेत निरन्तरता दिईने बताए । कार्यक्रममा न्यु भिजन स्कुलका प्राचार्य केशव श्रीसले शैक्षिकसंगै अन्य गतिविधिमा आफना विद्यार्थी अब्बल रहेको भन्दै अतिरिक्त कार्यक्रमलाई बिशेष जोड दिदै आएको बताए । कार्यक्रममा करीब २५० बिद्यार्थीहरु सहभागी रहेका थिए ।