खोज

बुटवल,२० फागुन । फागुन १२ गते चितवन रत्ननगर नगरपालिका १० स्थित एकता शिशु निकेतनको होस्टेलमा झुण्डिएको अवस्थामा फेला परेकी शालिन पोखरेलको मृत्युबारे जिल्ला प्रहरीले आफ्नो धारणा सार्वजनिक गरेको छ ।

कक्षा ८ मा पढ्दै गरेकी १४ वर्षिया शालिनको झुन्डिएको अवस्थामा होस्टेलमा शव फेला परेको घटनालाई लिएर उनले आत्महत्या गरेको नभएर हत्या भएको आशंकामा परिवारले तीनजना विरुद्ध किटानी जाहेरी दिएका छन् । प्रहरीले यो घटनाको वस्तुनिष्ठ अनुसन्धान भइरहेको बताएको छ । शनिबार विज्ञप्ति जारी गर्दै जिल्ला प्रहरी कार्यालय चितवनले भनेको छ, ‘घटनास्थलमा विशेषज्ञ टोली खटिएर मृतकको शवको सूक्ष्म अवलोकन गरी प्रारम्भिक चरणका कार्यहरू सम्पन्न गरी सो घटनाको गम्भीर अनुसन्धान भइरहेको छ।’

चितवन प्रहरी प्रवक्ता प्रहरी नायब उपरीक्षक श्रीराम भण्डारीले जारी गरेको विज्ञप्तिमा भनिएको छ, प्रहरीले आफ्नो पेशागत मूल्य, मान्यता, दक्षता र विवेक प्रयोग गरी अनुसन्धान गरिरहेको छ, वैज्ञानिक प्रयोग र प्राविधिक विश्लेषणसमेतका आधारमा तथ्यपरक वस्तुनिष्ठ अनुसन्धान गरिने छ।’

अनुसन्धानका वैज्ञानिक परीक्षण प्रतिवेदनहरू आइनसकेकाले अनुसन्धान कार्यमा सहयोग गर्न पीडित परिवार तथा आम सरोकारवालासँग अनुरोध गरेका छन्।

प्रारम्भिक अनुसन्धानमा १४ वर्षीया छात्रा होस्टलमा अन्य साथीहरूसहित बस्ने कोठाको सिलिङ पंखामा डोरीको पासो लगाएर झुन्डिएको अवस्थामा फेला परेकी थिइन्।

उनले आत्महत्या गर्नुअघि सुसाइड नोट लेखेकी थिइन्। त्यसमा सरी ममी, सरी ड्याडी, सरी एभ्रिबडी लेखिएको छ। शालिनका बुवा आमा शालिन चार वर्षकी हुँदैदेखि उनीसँग छैनन्। यो १० वर्षमा शालिन ८ वर्ष मामाघर बसिन्। होस्टेल बस्न थालेको जम्मा दुई वर्ष हुँदैथियो।

बाहिर आएजस्तो उनको बलात्कारपछि हत्या भएकोतर्फ अहिलेसम्म कुनै तथ्यले साथ दिएका छैनन्। शवको पोष्टमार्टमका लागि त्रिवि शिक्षण अस्पताल महाराजगन्ज लगिएको छ । रिपोर्ट आएपछि थप तथ्यहरू खुल्ने प्रहरीले भनेको छ । अस्वाभाविक मृत्यु देखिए अनुसन्धानले अर्को मोड लिने बताए ।

शालिन चार वर्षको उमेरदेखि रत्ननगर १२ स्थित मावलीमा बस्दै आएकी थिइन्। उनी दुई वर्षदेखि मात्रै उक्त स्कुलको होस्टेलमा बस्दै आएकी थिइन्।

उनका बुवा आमाले १० वर्षअघि सम्बन्धविच्छेद गरेका थिए। उनकी आमाले पाकिस्तानी नागरिकसँग बिहे गरेर विदेशमै घरजम गरिरहेकी छिन्। उनका बुवा काठमाडौं बसुन्धरामा कान्छी श्रीमती साथ बसिरहेका छन्।
शवको प्रारम्भिक विवरणअनुसार उनको गालानेर डाम छ। घाँटीमा डोरीको डाम छ। शरीरका अन्य भागमा प्रहरीले प्रारम्भिक अनुसन्धानमा कुनै बाहिरी चोटपटक भेटेको छैन। सुरूमा बलात्कार भएको नदेखिएकाले रिपोर्ट आएपछि नै सबै कुरा जानकारीमा ल्याइने प्रहरीले जनाएको छ। परिवारले प्रिन्सिपल ६० वर्षीय बालहरि देवकोटा, भाइसप्रिन्सिपल ४० वर्षीय किरणबहादुर अधिकारी र ४८ वर्षीय वार्डेन कमल शर्मा पौडेलविरुद्ध किटानी जाहेरी दिएका छन् ।