खोज

बुटवल, १ फागुन । बुद्धको अस्थिधातु रहेको नवलपरासीको रामग्राम स्तूप क्षेत्र निजी कम्पनीलाई लिजमा दिने लुम्बिनी विकास कोषको निर्णय खारेज भएको छ।

कोषको आज काठमाण्डौँमा बसेको बैठकले गौतमबद्धको अस्थिधातु रहेको रामग्राम स्तूप क्षेत्र लिजमा दिन प्रमिष्ड ल्याण्ड कम्पनीसँग गरेको समझदारी एमओयु खारेज गर्ने निर्णय गरेको हो।

यसअघि सोमबार मात्रै संसद्को सार्वजनिक लेखा समितिले रामग्राम स्तूप क्षेत्र निजी कम्पनीलाई लिजमा दिन गरिएको सम्झौता खारेज गर्न निर्देशन दिएको थियो।

कोषका अध्यक्ष एवं संस्कृति पर्यटन तथा नागरिक उड्डयन मन्त्री सुदन किराँतीको अध्यक्षतामा बसेको बैठकले सार्वजनिक लेखा समितिको निर्देशन कार्यान्वयन गर्ने निर्णय गरेको कोषका सदस्य सचिव सानुराजा शाक्यले बताए।
रामग्राम स्तुप क्षेत्र प्रधानमन्त्री पुष्पकमल दाहाल निकटका ठेकेदार शारदाप्रसाद अधिकारीका छोरा निकेश अधिकारीको कम्पनी प्रमिष्ड ल्याण्डलाई ९ढ वर्षका लागि लिजमा दिने समझदारी भएको थियो ।
रामग्राम परियोजनामा स्थानीयवासीको करिब ११६ बिघा जग्गा अधिग्रहण गरी संरचना निर्माण गर्न प्रमिस्ड ल्यान्डलाई दिने सैद्धान्तिक सहमति भएको थियो ।

प्रमिस्ड ल्यान्डले गत पुस २६ गते प्रधानमन्त्री प्रचण्डको जन्मदिन पारेर प्रधानमन्त्री प्रचण्ड, पर्यटन मन्त्री सुदन किरांती तथा कोषका पदाधिकारीलाई समेत प्रभावित गर्न ५० लाख रुपैयां बढी खर्च गरेर रामग्राम दूरदर्शी परियोजना शुभारम्भ गरेको थियो ।
तर विवादास्पद छविका लुम्बिनी विकास कोषका उपाध्यक्ष ल्हारक्याल लामाको अग्रसरतामा विना प्रतिष्पर्धा स्तूप क्षेत्र ९९ वर्षका लागि लिजमा दिई प्रधानमन्त्री निकटका ठेकेदारका छोरालाई निर्माणको काम दिने विषयले स्थानीय राजनीतिक दल र रामग्रामसंग सरोकार राख्नेहरुले विरोध जनाउँदै उक्त सहमति बदर गर्न माग गरेका थिए ।