खोज

काठमाडौं,२८ माघ । बिचौलियामार्फत् वैदेशिक रोजगारीका लागि दुई महिनाअघि युनाइटेड अरब इमिरेट्स् यूएई पुगेका १५ नेपाली दुबईमा अलपत्र परेका छन् । पोखराको जब प्लेसमेन्ड सर्भिस प्रालिमार्फत दुबई पुगेका उनीहरू सम्झौताअनुसारको काम र पारिश्रमिक नपाएपछि अलपत्र परेका हुन् ।

म्यानपावर कम्पनीलाई प्रतिव्यक्ति १ लाख ५० हजारदेखि २ लाख ५० हजार रुपैयाँभन्दा बढी पैसा बुझाएर गएका उनीहरुलाई त्यहाँ म्यानपावरले सम्झौता गरेअनुसारको काम र तलब नदिएपछि अलपत्र परेको चित्रमणि महतोले बताए । दुई महिना बितिसक्दासम्म कम्पनीले काम दिन्छु दिन्छु मात्र भनेको तर नदिएपछि दुई महिनादेखि बन्द कोठामा कामको पर्खाइमा बसिरहेका उनले बताए । नेपालबाट पठाउने म्यानपावरले पनि फेब्रुअरी १८ तारिखभित्र काम दिने भनेको तर त्यो म्यानपावरको भनाइमा पनि विश्वास गर्ने केही आधार नभएको उनले बताए । आफूहरूले एउटा भिडियो बनाएर सामाजिक सञ्जाल फेसबुकमा हालेपछि म्यानपावरले धम्क्याउने गरेको उनीहरूले बताएका छन् । म्यानपावर पोखराको जब प्लेसमेन्ड भए पनि उनीहरू काठमाडौंको कस्तुरी म्यानपावरबाट गएका हुन् ।
म्यानपावरले एक साता पर्ख दुई साता पर्ख भन्ने गरेको भन्दै झुल्याउने गरेकाले तत्काल आफूहरूलाई उद्धार गरेर नेपाल फर्काउन पीडितले माग गरेका छन् । आफूहरू कम्पनीको चाइना क्याम्पमा बस्दा खानाको लागि ३५० दिराम दिएको भए तापनि अहिले अर्को क्याम्पमा सारेपछि १०० दिराम दिएको र त्यहाँ खाना पनि महँगो हुँदा त्यो पैसा पनि सकिएर भोकभोकै बस्नुपर्ने अवस्था आएको उनीहरूले बताएका छन् ।