© २०२३
२८ भाद्र २०८१, शुक्रबार
२८ भाद्र २०८१, शुक्रबार
बुटवल,२६ माघ । प्रदेशस्तरीय अन्तर मावि हाजिरीजवाफ प्रतियोगिताको उपाधि बुटवलको एभरेष्ट बोर्डिङ हाइ स्कूलले जितेको छ । न्यू होराइजन मावि बुटवलको आयोजनामा पुसदेखि सञ्चालित ३० औं संस्करणको प्रतियोगिताको शुक्रबार सम्पन्न फाइनलमा अन्य ५ विद्यालयलाई पछि पार्दै एभरेष्ट विजेता बनेको हो ।
प्रतियोगितामा दमकडा मावि पालपा दोस्रो र सुनगाभा पब्लिक बोर्डिङ मुर्गिया तेस्रो भएका छन् । यस्तै जनता माावि (जेभिटी) तानसेन,मेचीकाली बोर्डिङ घोराही र जनज्योति विद्या मन्दिर घोराही सान्त्वना भएका छन् ।
विजयी विद्यालय र विद्यार्थीहरुलाई न्यू होराइजन संस्थाका कोषाध्यक्ष रामेश्वर श्रेष्ठ,विद्यालयका प्राचार्य लोकनाथ उपाध्याय,सहप्राचार्यहरु बालकृष्ण भण्डारी,बासुदेव अर्याल र राजीव श्रेष्ठ लगायतले पुरस्कार र प्रमाणपत्र प्रदान गरे ।
प्रथमले ३३ हजार,दोस्रोले २४ हजार र तेस्रोले १८ हजार तथा सान्त्वना भएका तीनवटा विद्यालयले ३ हजारका दरले नगद पुरस्कार प्राप्त गरे ।
फाइनल प्रतियोगिताको उद्घाटन गर्दै निजी तथा आवासीय विद्यालय अर्गनाइजेसन प्याब्सन रुपन्देहीका अध्यक्ष अनन्तराम शर्माले हाजिरीजवाफ अरु अतिरिक्त क्रियाकलाप भन्दा फरक र ज्यादै महत्वपूर्ण विधा भएको उल्लेख गर्दै यसले विद्यार्थीलाई बौद्धिक क्षमतामा अब्बल बनाउने बताए । उनले न्यू होराइजन देशकै अग्रणी शैक्षिक संस्था बनेको भन्दै प्रतियोगितालाई राष्ट्रियस्तरको बनाउन सुझाव दिंदै सरकारले निजी विद्यालयलाई गरेको विभेद र पक्षपातविरुद्ध सबै निजी विद्यालयहरु एकजुट भएर आवाज उठाउनुपर्ने बताए ।
संस्थाका कोषाध्यक्ष रामेश्वर श्रेष्ठले गुणस्तरीय शिक्षासंगै विद्यार्थीको सर्वाङगीण विकास र सामाजिक उत्तरदायित्वका क्षेत्रमा संस्थाले ठूलो लगानी गरेको बताए ।
विद्यालयका प्राचार्य लोकनाथ उपाध्यायले संस्थागत र सामुदायिक विद्यालयहरुबीचको सम्बन्ध सुमधुर बनाउने उद्देश्यले २०५० सालमा शुरु भएको प्रतियोगिता जिल्ला हुदै प्रदेशस्तरीय बनाइएको बताए ।
बुटवल, लमही र तानसेनमा छनोट चरण भएको प्रतियोगितामा पहिलो चरणमा ८७ विद्यालयले प्रतिस्पर्धा गरेकामा तीन वटै केन्द्रमा प्रथम र दोस्रो भएका ६ वटा विद्यालय फाइनलमा प्रवेश गरेका प्रतियोगिताका संयोजक कमलापति अर्यालले बताए ।
यसअघि तीनवटै केन्द्रमा प्रथम, द्वितीय, तृतीय र सान्त्वना ३ वटा टिमलाई क्रमशः प्रथम पुरस्कार ९ हजार, द्वितीय पुरस्कार ६ हजार, तृतीय पुरस्कार ४५ सय र प्रोत्साहन पुरस्कार ३ समूहलाई प्रति समूह १५ सयका दरले प्रदान गरिएको थियो । गत वर्ष भएको प्रतियोगितामा दाङको तुलसी माथि प्रथम, एभरेष्ट मावि बुटवल दोस्रो र बुद्ध पब्लिक मावि देवदह तेस्रो भएका प्रतियोगिता समापनका सञ्चालक विद्यालयका शिक्षक हरिप्रसाद पौडेलले जानकारी दिए ।
© २०२३
सर्वाधिकार सुरक्षित
Design & Developed By:
