खोज

बुटवल,९ माघ । युवा जनशक्तिको बढ्दो विदेश पलायनका कारण ग्रील तथा स्टिल उद्योगमा मजदुर अभाव भएकाले यसलाई रोक्न सरकारको ध्यान जानुपर्ने उद्योगीहरुले माग गरेका छन् । ग्रील तथा स्टिल व्यवसायी महासंघ लुम्बिनी प्रदेश समितिले मजदुरहरुको विदेश पलायन रोक्न युवालाई सीपमूलक तालिम दिन वजेट व्यवस्था गर्नुपर्ने माग गरेको छ । युवा पलायन, महंगो र धेरै निकायमा तिर्नुपर्ने कर,चर्को बैंक ब्याजदर लगायत उद्योगीले भोग्नुपरेका समस्या, साना मझौला उद्योगीहरुलाई राहतको माग बारे महासंघले छिटै प्रधानमन्त्रीलाई ज्ञापनपत्र बुझाएर समस्या समाधानको पहल गर्नुपर्ने प्रथम वैठकले निर्णय गरेको प्रदेश अध्यक्ष अशोक वर्माले बताए ।
यस्तै करको दायरामा नआई विना दर्ता सञ्चालन भएका व्यवसायीलाई बाह्र वटै जिल्लामा करको दरमा ल्याउन सरकारको ध्यान जानुपर्ने पनि व्यवसायीको माग छ । वैठकले प्रदेशका १२ वटै जिल्लामा संगठन विस्तार र सुदृढिकरण गर्ने,मजदुरको ७ लाखसम्मको वीमा जिल्ला तहमा गर्ने,अन्तारष्ट्रिय स्तरको औद्योगिक मेशिनरी मेला बुटवलमा आयोजना गर्ने, व्यवसायीको सामूहिक लगानीमा १२ वटै जिल्लामा एउटै नामबाट फलाम, स्टिल र आल्मुनियमका सामानको पसल सञ्चालन गर्ने र सामूहिक लगानीमा उद्योग पनि सञ्चालन गर्ने विषयमा छलफल भएको अध्यक्ष वर्माले जानकारी दिए ।